Aizawl August 16, 2024 : Ni 9 August-a R.G.Kar Medical College & Hospital, Kolkata a Post Graduate zirlai hmeichhia Dr. Moumita Debnath rawng taka pawngsual leh thah chungchangah India rampum a medical community te chuan na takin an dem a. Indian Medical Association (IMA) General Headquarters chuan August 17, zing dar 6:00 AM atanga August 18, zing dar 6:00 AM (darkar 24) chhung hian India rampum huapin medical service zawng zawng (emergency tiam loh) ti tawp a nawrhna neih nise an ti.

IMA Mizoram State Branch pawhin IMA Headquarter hmalakna hi an thlawp a. Chuvang chuan hemi hun chhung hian Mizoram a Hospital (sawrkar, private leh Mission Hospital) zawng zawngah Emergency services chauh hawn nise an ti a, OPD ah Doctor tumah an thu dawn lo tih kan hriattir e. Hei hian Private clinic te pawh a huam vek ang. Tihdam rawngbawlna a thawktute chunga hleilenna thleng fo mai hi kan duhlo a, a thlen tawh loh na tura tan la turin mi zawng zawng an ngen.