ZALEN August 11, 2025 : Vawiin khan khan ram pum huap rulhut hlo pek beihpui thlakna programme (National Deworming Day) hawnna hun (launching programme), Mizoram hmun hrang hrangah hman a ni a. He rulhut hlo pek beihpui thlak hian rulhut vanga naupang thisen tlachham leh hrisel lohna a thlen theih tihbo chu a tum a ni.

Mizoram-ah chuan a hmanna pui ber chu CMO Aizawl East District huaihawtin Government Central Higher Secondary School, College Veng-ah hman a ni a, He rulhut hlo pek beihpui thlak hawnna inkhawmah hi Samuel Ralte, EE, AWDD, North Division, PHE Aizawl chuan khuallian niin a chhim, beihpui thlak programme hi a hawng nghal bawk a ni. Khuallian chuan department hrang hrang thawhhona pawimawhzia leh NDD pawimawhna te a sawi.

Hawnna programme tawi hi Dr. Lalhlunpuii, Sr. CMO chuan kaihruaiin, rulhut-hlo ei pawimawhna leh department dangte nen a thawhhona tha neih a pawimawh thu a tarlang. Dr. Lalbiaksangi Rawihte, DRCHO chuan NDD chungchang a hriattur pawimawh leh Rulhut hlo ei pawimawhna leh ei dan tur dikte zirtirna hun a hmang bawk.