Aizawl: Kum tin January 25 a India ram puma hman thin National Voters day chu nimin khan Mizoram khawpui hrang hrang ah hman a ni a. Aizawlah chuan Synod Conference Hall-ah he ni hi hman a niin Governor P.S. Sreedharan Pillai chu khuallian a ni.

Governor P.S. Sreedharan Pillai chuan, "Ram zalena cheng leh mipui aiawh thlangtute kan nih avangin khua leh tuite tan he ni pawimawh tak hi a hlu hle a. Voters’ Day in a tum ber chu Vote nei thei chin, kum tling tawh apiang te Vote neih tir a ni a. Vote neih hi khua leh tuite chanvo leh dikna a nih mai bakah mawhphurhna hlenna a ni," a ti a. Sawrkar hnathawk, Media te leh mi vengva zawk te chuan vote hlutna leh sawrkar tha siamna hmanraw pawimawh a nihna hi khua leh tui te hnenah uar takin zirtir se a duh tih a sawi.

Governor chuan kumina thupui thlanchhuah ‘Democracy tihchakna tura inthlan kalphung hriat chian’ tih chu a pawimawh thu a sawi bawk.
Mizoram pumah voters 783900 an awm mek a, heng zingah hian mipa 3,81,897, hmeichhia 4,02,000 leh Third gender 3 an awm a. Voters zingah Darrohnuni (106 yrs), Kawrthah chu a upa ber nia hriat a ni.