Aizawl June 10, 2023 : Vawiin khan Lalvunga Battalion, Mizo National Army Rising Day vawi- 56 na lawmna chu KV Resort , Durtlang-ah neih a ni a. MNF General Headquarter Treasurer, K Ex Minister chuan Nationalism thinlung pua engpawh kan tih zel chuan, hlemhletna leh thil diklo hian hmun a chang thei lo, a ti

Khuallian K Vanlalauva Ex minister chuan "Nationalism thinlung pua engpawh kan tih zel chuan, hlemhletna leh thil diklo hian hmun a chang theilo a, midangte tana malsawmna a kengtel zawk a ni," a ti. "Sawrkar hna thawhna ah leh kawng engkimah nationalism thinlung kan put tlat chuan hmabak eng tak kan nei zel ang. Kum sangbi tamtak liamta a hnam ropui leh changkang lo ni tawhte nen hmasawnna kawngah tehkhin chi kan nilo a, hnam hmangaihna thinlung puin theihtawp chhuahin kan um zel zawk tur a ni," a ti bawk. 

K Auva chuan Lalvunga Battalion, Mizo National Army Rising Day vawi- 56 na lawmnaa kalkhawm zawng zawngte chibai a buk a, Mizo hnam hi vai awp behna ata chhuah kan duh a, India chuan chu chu a phallo a, MNF chuan chumi chu a do a, tan a la a, Kan inkap ta anih kha a, kha kha in inpekna rah chhuah vek a ni a ti. Pathianin MNF te A hruai dan Leh A chhanchhuah dan hi a makin a ropui a. Kan hnam Movement a ral theihna leh harsatna tawp khawka an awm lai pawhin engtin emaw hian Pathianin kawng a siam sak thin a ni tih hi a chiang em em a ni a ti.

Khuallian chuan Mizoram leh hnam chhana a nunna hlu tak hlantu hnam Martar te chibai buk a pawimawh thu sawiin, "Anni chuan mahni aiin hnam dah hmasa in Mizo hnam dinchhuah nan an inpe a, I chawimawi ang u. Mizo Hnam Movement avanga kawng hrang hrang a tuar tu te, sawisak leh hliam tuar te, lung In tang leh In leh Lo chan te I hre reng ila, heng tawrhna te hi ram leh hnam tan vek a ni tih hre reng ila, chutiangin ram leh hnam tana rammu zawng zawng te pawh kan hre reng a ni," a ti.

Khual zahawm  Lalrinenga Sailo Mayor AMC Pawn thusawiin L Batalion member lo kal te a chhuan  thu a sawi a, Ram ropui tak tak te hian an sipai ropui, zalenna sualte hi an zahin an ngaihlu em em thin a. Keini pawn kan martar te leh an thlan te hi kan zah a thangthar lo awm tur te pawh in an la ngaihhlu dawn chauh a ni a ti.

He hun hi Hunkhatnaah Saihnuna Sailo, Leader L- Battalion Re-union chuan kaihruaiin, hun hnihnaah Lalchhuanthanga Asst Leader Organising Committee chairman chuan a  kaihruai a, Upa Liankhuma, Sawleng Re-Union Member chuan hunserh a hmang a ni. L Battalion Member boralta mi 37 te Sunna hun hman a ni bawk a, Lalbiakthanga, Treasurer L Battalion Re-Union chuan lawmthu sawina hun a hmang.