North Atlantic Treaty Organization (NATO) ramte chuan Ukraine chu Russia laka a invenna turin missile leh radar tam zawk an pe dawn tih an puang ta rup mai. Ukraine thawhpui ram 50 te chu NATO Headquarters, Brussels-ah an inhmukhawm a, thutlukna hi an siam ta a ni. 

Tun hnaiah Russia chuan na zawkin Ukraine khawpui hrang hrang a bei leh a, hei vang hian NATO ramte chuan van boruaka invenna tha zawk Ukraine hi pek an tum ta a ni. NATO ram zingah hian - UK, Canada, France leh Netherlands te chuan ramthuam an pek tur thu hi an puang tawh a, Germany pawhin ralthuam a pek belh tur thu a lo puang tawh bawk. 

NATO ramten ralthuam an pek tur zingah hian missile leh radar te a tel a, hei hian an boruak sosan zia a tarlang chiang hle. Radar hi vansang atanga missile, nuclear leh indo thlawhna hmanga beihna lo thlithlaina leh hmuh lawk theihna a ni a, hei hi tun boruakah chuan Ukraine hian a mamawh hle a ni. Russia chuan Ukraine hi tun hnaiah missile hmangin a ralsai nasa hle a, hei vang hian missile lo kahthlakna tur hi an pe dawn a ni. 

Russia chuan Ukraine hi tun hnaiah ringawt pawh tum 100 vel zet chu missile hmangin a kap nia sawi a ni a, infrastructure leh building pawimawh tak takte bakah, naupang infiamna hmun thlengin a kap nia sawi a ni. Mi 100 chuang an thih leh tawh bakah, hliam tuar pawh an pun belh nasa hle. 
 
Russian President Vladimir Putin chuan he tianga missile hmanga an beih leh chhan hi Ukraine-in Russia leh Crimea inkalpawhna lei a tihchhiat vang niin a sawi. Russia hian Ukraine ram chhung Crimea hi a ramah a lo puang tawh a, inkalpawhna turin lei km 19 zeta thui a dawh zui bawk. Mahse hei hi tun hnai mai khan bomb chhiat a ni a, hei hi Ukraine tih niin Russia chuan a puh a ni.