September 8, 2023; Addl District & Session Judge cum Fast Track Court judge Julie Lalrinzami chuan 'The Protection Of Children from Sexual Offences (POCSO) Act, 2012 tlawh chhanin Laldingluaia (61) s/o Thangkunga (L), Thingdawl Hmarveng chu kum 20 chhung hreawm taka jail tang tur leh Rs. 10,000 chawi turin a hrem a, pawisa chawi tur hi a pek loh chuan thla khat dang jail a tan belh leh ang.

Court judgement-ah tarlan a nih danin, Laldingluaia hian 23.12.2021 khan hmeichhe naupang kum 6 mi chu mipat hmeichhiatna hawiin a khawih a, hemi ni hian a lakah FIR thehluh a ni. Police ten chhuizuiin 3.3.2022 khan chargesheet a ni a, pawi a khawih lai hian kum 59 mi a ni.

Court chuan POCSO Act 2012 ah a tuartute kum 16 hnuailam an nih chuan pawisa chawi chungin a tlem berah kum 20 leh a rei zawngah dam chhung jail tang thei an ni a, Laldingluaia chu tunhma in thubuai engmah la nei ngai lo a nih thu te, amah pawh insiamtha thei a la nih thu sawiin hremna hniam ber a pe a ni.

Laldingluaia hi thla hlui August 29 khan court chuan thiamloh a chantir a, nimin khan hremna hi a puang zui leh a ni.

Hetih rual hian a tuartu naupang pawh 'Mizoram Victim of Crime Compensation Scheme 2011' kaltlangin zangnadawmna a dawn theih nan Secretary, Kolasib District Legal Services Authority chu hmala turin hrilh a ni bawk.