July 21, 2023; Champhai Addl. District & Session Court chuan hmeichhe naupang pawngsualtu chu kum 20 chhung lung In tang tur leh pawisa chawi turin a hrem.

Nimin-a Court in thiamloh a chantir tak hi C. Lalremmawia niin, October 19, 2021 tlai-ah Champhai District chhung khaw pakhat a hmeichhe naupang kum 8 mi chu a chhungte hnathawh hlanin Rs.100 pe-a thlemin pawngsual ah puh a ni a, hemi zan hian hmeichhe naupang hian a nu hnenah pawngsual a nih thu hi hrilhin Champhai Police Station-ah FIR thehluh a nih hnuah man a ni.

Hmeichhe naupang hi endik a nihna atangin khawih chhiat ngei a ni tih finfiah a nih bakah thuhretu hrang hrangte thusawi atangin Champhai Addl. District & Session Court chuan pawngsualtu-a puh hi thiamloh a chantir a. Rim taka thawk chunga kum 20 chhung lung In tang tur leh Rs. 10,000 chawi turin a hrem a, a sum chawi tur hi a pe thei lo a nih chuan thla 1 dang a tan belh ang.