ZALEN August 11, 2023 : Vawiin khan Mizo Hnam Run chhung inkhawm neih a ni a, he huna thusawitu Chief Minister Zoramthanga chuan NDA chu a thu a zira thlawpa thlawp lo mai an nih thu leh MNF chu Pathian leh ram tan tia nghet taka thuthlung vuantu a nih thu a sawi.

MNF President Zoramthanga chuan, "Niminah India sawrkar paihthla turin Parliament-ah no confidence motion thehluh a ni a. Mipuiin MNF chu NDA-ah a tel avangin an thlawp a ngem, thlawp lo ang em tih an ngaihtuah nasa a. MNF MP-te chet dan chu kan hriat vek kha. Central-ah pawl lian tak pahnih UDA (Congress telna) leh NDA (BJP len berna) a awm a, keini chu Congress telna a awm chi kan ni lo hrim hrim a. NDA-a kan tel dan hi issue base-in kan tel mai a, an thu a zirin kan thlawpin kan thlawp lo mai. MNF chu Pathian leh kan ram tan tia nghet taka thuthlung vuantu kan ni a ti.

Zoramthanga chuan, "CAB pawh Mizoramah hman kan duh lo a, kan do a, kan hmang lo. UCC pawh NDA chhawpchhuah ni mahse; kan vote pui lo. Prime Minister hnenah lehkhate pawh ka thawn a, kan duh loh leh kan do dawn tih nasa takin ka hrilh mai a ni. Tun tum Parliament-ah no confidence motion bulpui ber kha Manipur issue a ni a. Central-a opposition in an putluh kha kan thlawp mai a ni. Assam Chief Minister pawh Union Home Minister-in a rawn tirh anih ka ring a, min zawta kan do tur thu ka hrilh a. Opposition lam kan thlawp tur thu tlang takin ka hrilh a. Assam Chief Minister chuan absent mai turin min ngen a. Pu C.Lalrosanga kan MP (LS) pawh a nu damlo ICU-ah a awm lai ni mahse; tel luiin a thlawptuah a tang a ni," a ti.

CM Bunglow-a thil thleng chungchang sawiin, "Kan Congress unauten no confidence motion inthlawp ngei ngei tur a ni tiin ka Bangalow rawn luh an tum a. Min tihtir an tum hma daih khan tih kan lo tum dim diam daih tawh zawk a ni. Kan Information Minister Lalruatkima chu kan thil tum hrilh chiang turin ka hrilh a. Kan Congress unaute thangkam kha a per thelh chiang hle a ni. An haw lam kha Bhavan-ah an inhmu khawm leh ngei ang a, hlawhtling inti tak maw.! Khatih lai khan MKHC hotu mi 15-te nen thu pawimawh kan sawi lai a ni a, an haw hun pawh an tibuai zo vek a nih kha," 

"NDA a kan tel ve avang hian a chhung atangin na takin kan bauh ngam a. MNF chu NDA kan tel avangin Pu Modi-a thu thu a kal kan ni ve lo. A hma pawh khan an duh loh em em Burma lama kan unau raltlante pawh an ei leh in, silh leh fen nen khawvel hriatah kan pek tur thu kan puang a. Pu Modi-a hnenah pawh ka nute lama ka nu nuta pahnih chu Burma ramah lu an phum thu ka hrilh a. Burma refugee te tanpuina turin crores 10 ka dil laiin, crore 3 chauh min pe nghe nghe a ni. Kan Chief Secretary pawhin Central a dawr dawn khan min rawn be hmasa a. Kum 1970-71 chho khan East Pakistan atangin a maktaduai tel lopuitu kha India sorkar a ni a. In tih ang khan kan lo pui ve mai ti rawh tiin ka chhan tir a, huaisen taka keini anga Pu Modi-a do ngam hi an awm ve lo," Chief Minister chuan a ti bawk.