Aizawl July 17, 2023 : Congress Thalai, MPYCC chuan July 18, 2023-a Prime Minister Narendra Modia'n National Democratic Alliance (NDA) Meeting Delhi-a a koh-ah Chief Minister Zoramthanga chu tel ngei turin  an phut a, Manipur a Zofaten harsatna tak an tawk chunga NDA sawrkarin thlavang hauna engmah a la nei lo chu na taka dem turin an phut.

MPYCC chuan, "MNF party hi NDA meeting-ah hian tel ngei turin kan phut a. Manipur a kan unau Zofaten harsatna rapthlak tak an tawh lai leh awmze nei taka Kristian te Biak In 250 chuang suasam a, halchhiat a nih tawh hnuah pawh BJP kaihhruai Central a NDA sawrkar atanga an thlavang hauhna engmah a la awm lo te hi MNF President Pu Zoramthanga hian na taka a dem kan phut a ni," an ti. 

MPYCC chuan Chief Minister Pu Zoramthanga chu Prime Minister hnenah hian Manipur a remna leh muanna a awm theih nan, a rang thei ang ber a hma la tur leh huaisan tak a nawr turin an phut bawk a. 

Sakhaw zalenna chungchangah pawh Manipur a Zofate tawrh naah hian a phen-ah RSS te hmalak na a awm ngei a hriat a nih avangin, hemi chungchangah pawh hian huai taka sawi turin MPYCC chuan Chief Minister hi an phut bawk a ni.