Aizawl May 10, 2024 : Vawiin khan Dr Vanlalthlana, Minister, H&TE, etc. leh Prof. Lalnundanga, Registrar, Mizoram University chu Minister pisa-ah an inkawm a. He hunah hian zirna sang zawk chungchang sawi niin India rama zirna sang enkawltu University Grants Commission (UGC) bakah zirna kalphung thar, National Education Policy (NEP) 2020 zula Mizorama college leh university zirlaite hmakhua tur chungchang sawi ho a ni.

UGC duh danin Semester kal lai mek atangin zirlaite chuan Aadhaar an neih ngei ngei a ngai tawh dawn a. Aadhaar nena zirlaite data thlun zawm a nih loh chuan zirlaiten result an nei thei tawh dawn lo a. Hemi chungchangah hian zirlaite’n Aadhaar an neih vek a tul thu sawi lan niin, harsatna an tawh loh nan zirlai Aadhaar nei lote chu hma la rang turin Registrar hian a chah a ni.

Minister leh Registrar chuan NEP zula National Council for Teacher Education (NCTE)-in a duan, Integrated Teacher Education Programme (ITEP) chungchang sawiin, kum 2030-ah chuan zirtirtu ni duh tan ITEP course hi zir ngei ngei a ngaih tur chungchang an sawi dun a. ITEP hi integrated course niin undergraduate level-a subject specialization course leh teacher’s education course zir kawpna (dual major undergraduate degree) a ni a. Hei hi sawrkarin kalpui a tum avangin zirtirtu nih tumte chuan ITEP hi zawm ngei a tul thu sawi lan a ni.

Meeting-ah hian Autonomous College chungchang sawi ho a ni bawk a. National Assessment and Accredition Council (NAAC) hnuaia 0-4 inkara point 3.51 hmu bakah, National Accreditation Board (NAB) hnuaia programme pathum emaw a aia tam emaw-a accreditation nei, point 750 chin chung lam hmute chu Autonomous College dinhmuna dah theih an nih thu sawiin, NEP kalpui chhoh mek a nih avangin Mizoram Sawrkar hnuaia score nei tha zual college-te pawh Autonomous College dinhmuna dah a pawina a awm loh thu sawi a ni.

He hunah hian Sawrkar Laipuiin SAMARTH (System for Assessment, Accreditation, and Rating of Transparency and Holistic Education), online platform hmanga zirna in sangte accreditation awlsam zawka kalpui a tum thu sawiin, college leh university-te chu hemi kawnga hma lak ran a ngaih thu sawi ho a ni bawk.

Meeting-ah hian Principal Secretary, H&TE Pi Esther Lalruatkimi bakah State Nodal Officer for NEP, H&TE Prof. Benjamin Lalrinsanga te an tel.