New Market Sumdawng Joint Action Committee chuan an eizawnna hmun sak that mai a nih loh avangin an mangang tak zet tih an lo sawi tawh.

Congress Party  chuan a hmunah tlawhin, sumdawngte harsatna tawh mek chu sawrkar in ngaihven thuai se an duh tih an sawi.

Aizawl; Aizawl New market-a building sak that mek-ah Lushai Engineers Pvt. Ltd te hmalakna chin (foreign lane tia sawi thin), cheng nuai 3,641 senna tur ruahmanah 30% vel thawh a ni tawh a. Hetihlai hian main building thiahna hmun a chawhmeh zuarte thutna tur, Aizawl Smart City Projects Limited hnuaia building sak tur erawh bultan hun tur sawi theih a la ni lo.

Chhungkaw 2,000 chuangin eizawnna atana behchhana an hman New market a building sak that mek chungchangah hian, Commerce & Industries department hnuaia Contractor, Lushai Engineers Pvt. Ltd hotute chuan Covid leh sum harsatnain nasa taka a tihbuai thu ZALEN an hrilh a, tun dinhmunah building 2 sa mekin, hei hi a lai a building sak leh tur nen zawm a ni dawn a, tun dinhmun ah 30% bawr vel thawk tawh ah an inngai. Hna zawhfel hun tur sawi mai theih a ni rih lo.

Hetihlai hian main building thiahna hmuna chawhmeh zuarte thutna tur, Smart City Projects Limited sum hmanga building sak tur chu hnathawh tan hun tur sawi theih a la ni lo a, ZALEN thudawn danin, Detail project report (DPR) siam niin, hei hi pawm a nih hunah tender chhuah a hnathawktu (contractor) thlan tur a ni dawn a, DPR ah hian cheng Vbc. 34 vel ruahman a ni.