MoU ziak
Aizawl: Bulgaria-a IT Park Optela Director Vaska Stoyanova leh Mizoram University Incubation Centre Director Dr. Laldinliana te chuan tunhnai khan New Delhi-ah thawhhona thuthlung an ziak a. An thawhhona turah hian entrepreneurship education hmasawnna atan leh thiamna inpek tawnna atana thawhhona tur te a ni a. Hei bakah hian IT leh entrepreneurship lamah pawh mi thiamte university intlawhtawn nise an ti bawk.

Resolution 1 lut
Aizawl: Naktip Thawhlehni atanga ni thum awh Assembly session neih turah official resolution 1 a lut tawh a, resolution lut hi Forest Act hman lohna tur ‘The scheduled tribes and other traditional forest dwellers (Recognition of forests rights) Act’ a ni. Zawhna starred question 207, ziaka chhan chi unstarred question 22 leh paper lay tur 4 a lut tawh a, sorkar bill lut a awm hrih lo.

Police thuchhuah
Aizawl: Mizoram Police chuan tunlai hian State Bank of India hriatpuina leh phalna tel lovin Mizo Overseas Employment Agencies, Upper Khatla Aizawl chuan SBI Mutual fund hmangin mi eng emaw zat an bum niin an sawi a. He thilah hian FIR thehluh a niin he Agency lem hnuaia SBI Mutual Fund hminga pawisa lo dah zawng zawng te chu Officer in charge, Aizawl Police station-ah customer certificate leh lehkha pawi-mawh dang te nen inhriattir turin an ngen.

Speaker la ngawi
Zoram Peoples Movement Legislature Party in an hming thlak an dil chungchangah Speaker chuan thutlukna a la siam hrih lo a, zirchian turin a la kawl nia thudawn a ni.

Sihphir tlan theih loh
Vawiin Pathianni atang hian Project Pushpak (BRTF) chuan Kawnpui-Sihphir-Durtlang-Aizawl inkar kawng an siam dawn a, November ni 17 atanga ni 30.11.2019 inkar chhung he kawngah hian sumo aia lian tlan Aizawl SP chuan a khap a, a aia lian motor te chu Sairang road, NH-54 lamah tlan tur a ni. Chhiatrupna, kangmei leh emergency kaihhnawih a duty a huam lo ang.

Minister-in hawng
P&E Minister leh Tawi bailtu MLA ni bawk R. Lalzirliana chuan Zirtawpni khan Saitual District mipui ten tangkai taka an hman atan Saitual Bawrhsap Office a Conference Room leh Conference Hall thar te chu a hawng.

Thisen pe : Nimin khan Central KTP hmingin Kulikawn Pastor Bial KTP ten Aizawl civil hospital blood bank a dah turin thisen unit 60 an pe a, thisen petute hi mipa 52 leh hmeichhia 8 an ni. Central KTP hming vek hian Zotlang branch KTP ten Synod hospital tan unit 23 an pe a, mipa 17 leh hmeichhia 6 niin Aibawk bial PYD ten State Referral hospital tan unit 15 pein a petute hi mipa 13 leh hmeichhia 2 an ni.