Aizawl July 19, 2023 : Nilaini hian North East India State tin Congress Thalai chuan North East Youth Congress Coordination Committee (NEYCC) hruaitu thlanna an nei. Chairman-ah Arunachal PYCC President niin Vice Chairman pahnih awmin MPYCC Vice President Laltawnliana leh Assam PYCC President thlan an ni. Treasurer atan Nagaland PYCC President thlan niin, General Secretary ah Meghalaya PYCC President thlan a ni. Asst General Secretay pahnih thlan niin Covener atan State PYCC President dangte thlan anni bawk. 

Waii International Hotel, Bhalukpong, Arunachal Pradesh-a meeting-ah hian NEYCC Chairman thar Tarh Johny chuan  "North East State tin Congress Thalaite kan inzawmkhawm a tul a, state mal ang chuan tang viau mahila thiltih tak tak a harsatziate, BJP sawrkarin chhung lam leh pawnlam hmuh theihah min sawp chhiat nasatzia te a sawi a. Uniform Civil Court Parliament a pass tum mek pawh hi North East Congress Thalaiten a huhovin kan do a ngai a ni," a ti.

NEYCC Vice Chairman thar Laltawnliana pawhin thusawiin, "Nehru'n India ram hi pangpar huan mawi tak ang, a chhunga pangpar chi hrang hrang mawi tak par za-a tehkhin angin, a chhungah hnam hrang hrangte kan cheng za a. Mahse, tunah erawh chuan Pu Nehru-a lo sawi thin chu BJP ten mausamin,  hnam leh hnam inkarah inhuatna, intihbuaina a chhuak nasa a, sakhaw zalenna palzamin, India ram hi Hindu lal rama siam tumin an hmanhlel a, langsar takin an che mek a ni. Hei hi North East State pasarih Seven sister te hian a huhovin kan do dawn a ni ", a ti.

Meeting hi Arunachal Pradesh Youth Congress hruaitute huaihawt niin, State tin aṭangin PYCC President hovin an tel hlawm a. Mizoram aṭangin pawhin MPYCC President Laltawnliana, Sr.Vice President Ngurdingpuia Pachuau, General Secretary HP Lalchuailova, Secretary Milan Chhetri  leh C. Lalhruaivela te an tel a ni.