Aizawl : Mizoram People Forum (MPF) chuan MJA member te an kawmnaah Inthlan hun sawn tir emaw ruat tir emaw chungchangah ngaihdan leh rawtna siam thei an nih loh thu an sawi a, chutih rual chuan Local Council leh Village Council inthlan turah State Election Commission (SEC) ten thawhpuia an sawmna angin mipui te him zawk nan theihtawp chhuahpui an tum thu an sawi.

MPF chuan SEC in a sawmna angin inthlan chungchangah sawihona pawh an neih tawh tih press mi te an hrilh a, Swrkar leh Election Commission thu chu zawm mai tur an nih thu an sawi. Press mi ten tun tum inthlan tur hi a hun niin an hria em tih an zawhna chu MPF Vice Chiarman Rev K. Lalrinmawia chuan, "A hun leh ni chuchang hi kan sawi tur niin a lang lo a, sawi thei tur pawh kan ni lo. Sawrkar thu zawm a, inthlanna felfai a awm theihna tura hmalak mai hi kan tih theih chu a ni, " a ti. Intlar awm lo thei ang ber turin MPF chuan ruahmanna an nei tih a sawi a, Local Forum lamin an veng chhungah ruahmanna an nei tawh tih sawi langin veng thenkhat phei chuan vote thlak tur te chu an kal hun te an rua-hman sak thu leh social distancing ngaihpawi-mawhna avangin ruahmanna hi siam a nih thu a sawi bawk.

Tun tuma inthlana MPF ten tum danga an tih ngai loh tur an sawi lan chungchangah CYMA atanga he huna tel, MPF secretary Dr. Malsawmliana chuan, "Vote thlak te hming leh an contact number lak chu MPF ten tum danga kan tih ngai loh kan tih tur a ni a, kan tun dinhmunah hei hi tih makmawh pawh a ni," a ti.

Tun tum inthlanah hian tum danga duty tangkai tak MUP member te chu tel lo tura ngaih an nih thu an sawi a, hei hi hripui leng mek kum upa lam tan kai a awlsama ngaih vang a ni. Tin, rualbanlo ten awlsam taka vote thlak theihna turin Local Forum te chu hma la turin an hriattir tawh thu an sawi bawk.

MPF ten an member la ni lo Kohhran hrang hrang te an sawmna chungchang Press mi ten an zawhna chu MPF General Secretary chuan, "Kan sawmna hi chu an hmu kim tawh turah kan ngai a, chhanna tak hi ziak chuan kan la dawng lo a, mahse, thuphung chuan min rawn zawt an awm a, kalphung kan neih dan te pawh kan in hrilh a, mahse, a ziak emaw a tak emaw chuan tun thleng rawn zawm thar chu an la awm lo," tiin a chhang.

MPF leh MJA te inkawmhonaah hian MPF Chairman Rev. R. Lalchangliana chuan inthlan kan neih tura MPF te duhdan hrang hrang a sawi a, chung zingah chuan Inthlan sum senso hautak lo theih ang bera Party leh candidate te an ngenna te, campaign chungchanga pawh sawrkar phal bak pel lo tur leh aurinna hmang lo tur te, social media kan hman dana fimkhur tur leh thudik tawk lova inpuhna a awm a nih chuan thuneitute hnena hriatir an nih tur thu te a tarlang.

Inthlanna zalen tak a awm theihna turin security duty te bak hriamhrei leh ralthuam keng lo turin mipui te a ngen a, hel inrawlhna lakah leh sensitive area bikah venhimna theihtawpa kenkawh a tul thu a sawi a, political party chu mahni theih tawp bak tumah tiam lo tur leh, MPF nen thawhhona thuthlung an ziah tawh angin party tin te chu hei hi zawm hram turin a ngen bawk.