Mizo hmeichhe inzuar tura phai lama hruai thlak tih ang chi te hi kan bengah thil thar a ni tawh lo a, firfiak hovin sum tuak nan an sakhua mi ni lo an hralh thawm te thlengin kan hria. Mihring hmanga sumdawn hi thil thar a ni lo, Africa ram atangin sap hovin mi hang te an man khawm a, an hralh thin. Tuna mihring hmanga sumdawnna kan sawi hi chu nawhchizuar tura inhralh a ni a, chung ho hruaina kawng atan Mizoram an hmang ta hial a, ngaihven pawh a tul hle.
Tun hnai chhovah Nepal lam atanga middle-east lam pan tur nia sawi te chuan Mizoram kaltlangin Burma lamah chho an tum tih thawm a awm a, a hma chuan heng hmeichhe inzuar tur ho hian Manipur lam an paltlang thin a, tualchhung police lama rinhlehna a awm avangin Mizoram lam hi an rawn thlang ta niin ngaih a ni. Heng hmeichhia te hian inhlawh tur niin an insawi hlawm a, pasal fanau nei te pawh an nih hmel. Anni ho hi intihluihna lam pawh niin an lang lo a, mahse, hmeichhe hlang a nih miau avang leh an hmun pan tur ngaihtuaha an kawng rawn thlan avang hian rinhlelh loh rual an ni lo.
Nepal lam atanga an rawn hruai khawm hmeichhia te hi inzuar tur anga loh theih loh an nih avangin Nepal sawrkar hnenah thawn let an ni a, hei hi tih awm tak pawh a ni. Mihring hmanga sumdawnna kawngah hian Mizo zingah inrawlh thin te pawh an awm a, kan ram kaltlanga hetianga sumdawng te lo thawhpui duh mai tawk hi kan awm leh mai ang tih pawh a hlauhthawnawm hle.
Mizoram kaltlang hian ruihhlo, rangkachak leh lunghlu te pawh tawlhruk a ni thin a, khawchhak lam atangin India ram lairil lamah tawlhruk an ni thin. Middle-East lama kal tur anga insawi tuna hmeichhia an man te khawchhak lam hawia kalpui an ni hian ngaihtuah a ti thui a, kan ngaihven a, ngun taka kan chhut a ngai hle mai.
Hemi bakah hian Kaladyne Project hi kan la buaipui tur niin alang a, he kawngpui hi a tlang hunah chuan hmasawnna tam tak kan hmuh a rinawm a, chumi zinga a ken tel tur chu mihring hmanga sumdawnna hi a ni. 'A sen apiang hlau rawh u' tih lam nilovin hmasawnna hi kan pawm rualin a ken tel thil thalo do let tur hian kan inpuahchah a tul tak meuh a, tun ai hian kan ngaihvena khawtlang ang pawha fimkhur kan inzirtir a hun ta der mai.