Belgian TikToker hi a che maksak ve khawp mai. Tute nge amah ngaihsaktute hriat theih nan a thi niin a nupui fanaute a puan darhtir a, vuina inkhawm an hman mek laiin amah a inlan hlauh thung a, amah vuitute a barakhaih hneh hle.

Kum 45 mi, David Baerten-a hi a nupui leh a fapte nen inthurualin an thian leh chhungten thi ta se ang angin nge an ngaih tih hriat nan an tihder (prank) a, an chet dan erawh a uchuak lek lek mai.

A fate zinga pakhatin social media-ah a pa thih thu hi a tar lang a. “Ka pa, thlamuangin chawl ang che. Ka thinlungah i châm reng mai. Engati nge nun hi a fair loh em em? Engati nge nang kher? Pu i ni mai tawh dawn a, i nunah hmabak tam tak i la nei asin. Ka hmangaih che, kan hmangaih che, kan hre reng ang che,” a ti.

A vuina hun hi kar hmasa khan Liege khawpui bulah neih a ni a, a thian leh chhungte chu thawmhnaw duma inthuamin an kal khawm hlawm.

Inkhawm tan hun an nghah thap tawh laiin an vui tur ber, Baerten-a hi helicopter-in an bulah a lo tum ta mai thung a. TikTok-a video thehdarhah chuan a vui tura kalkhawmte hmuh laiin Baerten-a hi helicopter atang hian camera crew nen pen chhuakin lo awmte chu chibai a buk tih a lang.

Baerten-a chhungte leh thiante chu a lam panin an tlan a, lungchhe tak tak pawh an awm a. Thenkhat erawh mak ti taka ding reng pawh hmuh tur an awm.

The Times chanchinbuin a tar lan zui dan chuan TikToker hian a thi tih an hriata a chhungte a nghawng dan a hre duh tih a sawi a. “Ka chhungte khawsak dan hi tha ka ti lo va, engah mah tel turin min sawm ngai lo va, min hmu pawh an awm ngai lo. Kan puitling a, kan intihrang ta vek a, hei hi tha ka ti lo tak zet a ni,” a ti.

“Zirlai zirtir ka duh a, mi chu an thih hma ngeiin i ngaihsakna leh duhsakna chu i lantir tur a ni tih hriattir ka duh a ni,” a ti bawk.

Baerten-a hi TikTok-ah chuan Ragnar le Fou tia hriat a ni a, “Tute nge min ngaihventu ka hriat phah a ni,” a ti.