July 20, 2023; CM Zoramthanga chuan Manipur buaina ah ngawih chuh hun a ni ta lo tih a instagram ah tarlangin, Manipur CM leh PM Modi te chu a rang thei ang bera hmalakna nei nghal tur leh pawikhawihtute man chhuak a, Dan hmaa rorelsak thuai turin a phut.

CM Zorama chaun, Manipura nunrawng taka tharum thawhna chuan thenawm ramte chauh nilovin, ram pum a nghawng chhuak tih tarlangin, dinhmun chhe zawkah a ding mek tih a tarlang.

"Manipura kan Vaiphei hmeichhiate chunga nunrawnna lantirna video darh chhuak hian min tithinthawngin min deng na hle mai a. Video-a kan hmuh zahmawh thila inbeihna hi zahngaihna telllo nunrawng taka chetna uchuak, zahthlak tawpkhawk leh mihring chunga nunrawnna lantirna demawm tawp a ni. Manipur buaina chinfel leh tihtawp hlen dan kawng ngaihtuah hi a tul tak zet tawh a, a tihtawp dan ngaihtuah theitu tur pawh Sawrkar Laipui chauh a ni," a ti.

"Ka sawi nawn leh duh chu - Manipur buainaah hian mi tam takin nunna an chan tawh a, thisen tam tak a luang ral tawh a, hliam tuar leh sahimna zawnga hmun dang pan mi tam tak an awm belh zel bawk a, chung zingah chuan ka chipui Zo-hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo," tiin, "Ngawih chuh hun a ni ta love!" a ti bawk.

Buaina chinfel dan kawng awm apiang dapin, a rang thei ang bera ngaihtuah a ngai tak zet tawh tih tarlang bawkin, CM Zoramthanga chuan, remna leh muanna a lo awm leh thuai a, nunphung pangngai an zawh leh theihna tura kawng zawn nghal ni se a duh ber thu leh chu chu mawhphurhna la ngei ngei tura ngaihte mawhphurhna, Manipur sawrkar leh sawrkar Laipui te tihmakmawh pawh a nih thu a tarlang.

"A rang thei ang bera remna leh muanna kawng zawn hi an kova innghat tlat a ni. Chuvangin Manipur Chief Minister N. Biren Singh leh Prime Minister zahawm tak Narendra Modi te pawh a rang thei ang bera hmalakna nei nghal tur leh pawikhawihtute man chhuak a, Dan hmaa rorelsak thuai turin ka phut a ni," a ti bawk.