Aizawl: Langa Aizawl rawn tlawhtu, Union Home Minister Amit Shah chu nimin chawhnu dar 2:30 hian Raj Bhavan-ah NGO Co-Ordination Committee hruaituten an kawm a, Citizenship Amendment chungchang leh Tripura Transit Camp-a Tuikuk awm laklet kalpui mek chungchang an sawipui.

NGO thuchhuah tarlan danin Union Home Minister chuan CAB hian Mizoramah nghawng a neih lohna tur leh ILP hi chak zawka thuam a, CAB-ah proviso anga belh a nih theih nan hmalak a nih tur thu a sawi a, CAB hi an kaltlang pui a nih pawhin, ILP nei state-te ah chuan ILP hi inhumhim nan a hman zel a nih theihna turin, CAB-ah hian telh lut turin ruahman a nih tur thu leh Parliament-ah pharh a nih hmain Draft CAB hi NGO hruaitute nena enho hmasak a nih tur thu NGO hruaitute hi a lo hrilh niin an sawi.

Tripura Transit Camp-a Tuikuk awmte Mizorama a bo a bang awm lova an lo let theih nan leh Tuikuk lak let chungchang hi tihtawp a nih theih nan NGO hruaitute hian an ngen zui a, Interlocutor ruat a, a rang thei ang bera chinfel a tum thu Union Home Minister hian a lo sawi bawk a. Ramri awng nasa veng tur security tha tak dah belh tura NGO-in a thlen chu State sum harsat avangin Central sumin CRPF Battalion khat, Mizo hlang awmna din turin hma laksak a inhuam thu a sawi bawk.

Home Minister hmutu NGO hruaitute hi Vanlalruata, President, Central YMA; Lalhuapzauva, President, MUP; Lalthlamuani, President, MHIP; L. Ramdinliana Renthlei, President, MZP; Vanlalliana, President, MSU; R. Lalngheta, Vice President, Central YMA leh Lalhmachhuana, General Secretary, Central YMA te an ni.