Aizawl: Tlawmngai pawl hrang hrang te chuan Covid-19 vanga Power & Electricity department in meter reading a hmuna en lova ralkhat atanga bill an siam chu tha lo an tih thu sawiin hripui vanga meter en loh chu chhuanlam tlinga an ngaih loh thu an sawi a. Hetih lai hian Power & Electricity department hotute chuan JERC regulation anga thla 3 bill chawkruala thil ti an ni tih an sawi.

Power & Electricity department Minister R.Lalzirliana hova power hman man sang chungchang sawihona tunhnaia neihah he thu hi sawiin tlawmngai pawl hrang hrang te chuan he thu hi an sawi  chhuak a ni.

Mizoram Journalists' Association President Zonunsanga Khiangte chuan Power department in meter an lak loh chhan nia an sawi chu chhuanlam tling nia a hriat loh thu sawiin  Bill a lungawi lo te tan complaint na hmun tam zawk siam nise tha a tih thu a sawi.

Central YMA President Vanlalruata chuan Power department in thla 3 bill chawhrual anga bill an siam nia an sawi chu a dik chiah lo nia sawiin, "Department hian thla 3 chawhrual (average) ang takin bill siam se mipui hi kan phun ka ring lo a, bill tam takah pawm theih chin a pel a, hei vang hian mipui an lungawi lo niin a lang a ni," a ti a. Power department in eng an hloh (power loss) tam lutuk chu ngaimawh awm a tih thu leh P&E department chu Corporation ah leh tha a tih thu a sawi.

Mizoram Consumers Union Vice President Thanglura chuan, "Tunhnaia power hman man sanga mipui phunna chhan ber chu a hmuna department thawktu ten reading an la lo hi a ni a, kuminah pawh zirna in, biak in leh mi inluah thenkhat, a luahtute awm lo chunga bill a sang lutuk hi a dik lo a. Bill sang zual te hi ngaih-hnathiam dan awm se kan duh a ni," a ti a. MCU chuan Power hman man hi 10% bakin sang lo se an duh tih a sawi bawk.

Mizo Hmeichhe Insuihkhawm Pawl (MHIP) President T.Lalthangpuii pawhin meter reading latu te enchian tha a tih thu a sawi a. "Meter reading la tu ten an la thei lo anih chuan MHIP ten kan la mai ang," a ti a. Mizoram Upa Pawl President Lalhuapzauva pawhin power hman man (tariff) san chu hripui vanga mipui harsat lai nen a innan avangin a hun lo nia a hriat thu leh hei hian mipui a nghawng na zual nia a hriat thu a sawi bawk.

Power & Electricity department Engineer in Chief Lalduhzuala Sailo chuan thla thum bill chawhrual chu Joint Electricity Regulatory Commission (JERC) regulation anga ti an ni tih a sawi a. "Hrileng vangin meter reader ten hmun hrang hrang an tlawh hi a him loh avangin site ah chuan en lo mai se kan ti a ni," a ti a. Bill complaint chungchangah pawh, "Consumer te an lungawi loh a complaint a awmin ni danga bill pe phawt rawh u tih ang chi kha chu ti tawh lo turin kan hrilh a ni," a ti a. Power & Electricity department enfel turin reform committee din a ni tih sawi bawkin Chairman ah Chief Secretary leh Secretary ah Power Secretary ruat a ni tih a sawi bawk.