February 7, 2024; Ni 6.2.2024 (Thawhlehni) tlaiah NGO Coordination Committee ten MZP Office ah meeting an nei a, meeting hi Lalhmachhuana, Chairman, NGOCC (President Central YMA) in a kaihruai. Meeting ah hian NGOCC a tel pawl hrang hrang - CYMA, MUP, MHIP, MZP leh MSU hruaitute an tel. 

Meeting ah hian India Sawrkarin India leh Myanmar inrina pin (Border fencing) a tum chungchang leh ramri hnaiha chengte inkalpawh theihna ‘ Free Movement Regime( FMR) “ thiah a tum chungchang ngaihtuah a ni.

Myanmar ramchhungah Zofa unau thahnem tak an chen avangin Border Fencing leh FMR thiah tum hi anni nena kan inauna leh kan inpumkhatna ti chhe thei a nih avangin NGOCC meeting chuan tha a ti lova. Mizo hnam thendarh tumnaah a ngai a, chuvangin FMR hi dan hnuaia siam a nih angin tuna mi ang hian kal pui zel nise, Border fencing hian ramri a chengte tan nasa taka harsatna a siam dawn avang leh Mizo hnam inpumkhatna khawih chhe thei a nih avangin hemi kawnga hmalakna hi tihtawp a nih theihnan hma lak tha an ti a. 

Union Home Ministry ah NGOCC hmingin Memorandum thehluh nise, Mizoram sawrkarah pawh lehkha thehluh ni bawk se an ti. Hemi bakah hian border fencing in a nghawng tur state dangte pawh a tul anga thawhpuia sawm nise an ti bawk. Heng bakah hian a tul huna hmalakna tur an ruahmanna nghal bawk.