Aizawl June 21, 2023 : Mizoram leh Manipur ramri-a Mizoram Police inkulhna lian ber Ngopa Police Station ZALEN chu tlawh a, thawktu an indaih tawk lo niin a hmu. Veivahna tur atan Tuialhthei (POL) an dawn pawh an indaih lo niin hriat a ni bawk.

Ngopa Police Station-ah hian  thawktu Officer in Charge nen mi 15 bawr vel an awm a, MRP hi mi 8 an awm a, IR attach hi 4 an awm a, Manipur buaina avangin dah belh 2 awmin 4th Grade pakhat a awm bawk a, Saitual District hnuaia Police awm te hi an indaih lo niin khawtlang mi te chuan an sawi.

Tun dinhmunah Ngopa Police Station hian thla khatah Petrol Litre 50 an dawng thin a, hei hi an khamkhawp lo niin hriat a ni a, an case neihna tam tak pawh an petrol dawn nen chuan thlen theih loh chang a awm niin an sawi. Case nei khua ten an koh chang chuan an petrol man te khawtlangin an tum sak thin niin Khawtlang hruaitu te atangin hriat a ni bawk.

Manipur buai avanga Mizoram a rawn lut an tam avangin harsat chang an ngah tih an sawi a, Ngopa Police te hi Mizoram leh Manipur inrina Tuivai kamah leh Ngopa khawchhung luh dawnah a chhun a zanin an duty bawk a ni.

Tun dinhmunah Phullen Police Station din tum niin hriat a ni a, hei hi Saitual Superintendent of Police staff atanga inremsiam tur niin sawi a ni bawk.