ZALEN March 12, 2025 : Aizawl District Congress Committee kaihhruaiin vawiin khan C. Ngunlianchunga, MLA thlavang hauhna leh Assembly zahawmna humhimna atan Assembly House bulah an pungkhawm a, he hunah hian Ex MLA TT Zothansanga chuan Chief Minister chu a chetdan avangin Ngunlianchunga, House leh Mipui hnenah ngaihdam dil turin an phut.

He hunah hian MPCC Genral Secretary TT Zothansanga chuan thusawiin, "He hmuna kan lo kal chhan hi a lungchhiatthlak kan ti a, Mizoram rorelna sangah kan ram humhimtu tura kan lo ngaih leh kan nu leh pa ber kan CM Pu Lalduhoma’n a member pui te zah baksak lova thil a sawina avangin Zoram rorelna hmun hi a zahawmna a tlahniam zel dawn niin kan hria, a member puite chunga a rilru put hmang te kan en in tunah hian Pu C. Ngunlianchunga mai ni lo, Opposition member tam tak te thlavang hauh turin he laiah kan lo kal a ni," a ti.

"Assembly ah Chief Minister-in zawhna a chhan dan chungchangah keini hi kan dam thei lova, vawiin ni a kan lo punkhawm chhan hi LADC-ah Pu V. Zirsanga chungchang zawhna avanga lo piang chhuak niin, Pu C. Ngunlianchunga’n V. Zirsanga case dang a neih a zawt a, a zawhna chhan ta lo chuan a zawttu lam CM hian a beih let ta vak mai a, kha kha a unparliamentarian khawp mai a, khatiang kha thleng tawh lo se kan duh," an ti bawk.

MPCC General Secretary chuan, "V. Zirsanga hi HT Lalrinchhana’n February 19, 2024 khan kum 4 tang tur leh cheng nuai 4 chawi turin a convict a, ZPM Thalai Lai District Headquarters lamin Press Release a corruption thubuai nei CEM atan an duh loh thu an chhuah hnan tawh a nih bakah ZPM Manifesto kan en chuan Administrative Reforms-ah chuan ‘eiruk ti bo turin nasa taka hmalak a ni ang a, Lokayukta pawh hna thawk thei tura tih chantlun a ni ang' tih a nih laiin LADC lamah convict tawh hnu puan anga an pawm leh na te, an PR te enlet hian zak hle tur an ni a, C. Ngunlianchunga hnenah leh House hnenah leh Zoram mipui hnenah hian ngaihdam dil a ba niin kan hria a. Chuvangin helai ah hian Chief Minister hian ngaihdam dil ngei se," a ti.