ZALEN March 10, 2025 : Chief minister Lalduhoma'n House-a Lalmuanpuia Punte zawhna LADC CEM tura ruat V. Zirsanga case chungchang a chhannah C. Ngunlianchunga, MLA pawh case nei lai a nih thu a sawichuak a, Congress MLA hian case a neih thu a hriat loh thu a sawi a, CM-in a sawi hnuah a hre chauh tih press conference a neihnaah a sawi a, he case hi corruption case a nih thu leh a fihlim thu a sawi.

Hemi chungchungah hian Aizawl Press Club-a press conference ko nghalin C. Ngunlianchungah chuan case a neihna Lawngtlai By-pass road Thingkah atanga kawng siamna tur tih chingpen chungchang a nih thu a sawi a, CM-in anticipatory bail la tura a rawn chu lak a tum loh thu a sawi a, tan mai ni lo, a tul chuan ram tan chuan thih pawh a huam thu a sawi. He case-a sum tih chingpen chungchangah hian a fihlim a ti.

Ngunlianchunga chuan CEM a nih laia Non Lapsable Central Pool of Resources (NLCPR) atanga an sum hmuh tihchingpen a nih thu a sawi. Kawng laih tur hian hmalakna pawh thui tak kalpui a ni tawh a, 1st installment pawh Cheng nuai 470 chuang an hmuh hman thu a sawi a, mahse, Congress ministry-ah Minister hna a chelh a ngaih tak avangin CEM a nihna chu a kalsan a ngai a, a hnua CEM ni ta V. Zirsanga hnuaiah thuneihna a hlan avangin engmah sum leh pai chungchang a hriatpui loh thu a sawi a, tuna case a neihnaah hian a fihlim tih a sawi.

Ngunlianchunga chuan hemi kawng tur buaipui hian ram neitute nen pawh September 16, 2013 khan remna an ziak vek tih a sawi a, compensation ang chiah pawh ni lovin ram neitute chu Rs 20,000 theuh pek turin an tifel tih a sawi a, kawngpuiin a paltlang loh leivungin a tihchhiat ram neitute pawh Rs. 20,000 hian a huam tel a ti.

Vawiin assembly session zawhna leh chhanna huna chief minister chuan, thubuai nei zingah C Ngunlianchunga a tel tih a sawi a, chargesheet peih thawkhat a ni tawh a, prosecution sanction dil mek a ni bawk a, chuvangin anticipatory bail lo laklawk te pawh a that a rin thu a sawi.

Hetihlai hian C. Ngunlianchungan thubuai a neih a hriat loh thu a sawi thung a..., "Ka chungchangah prosecution sanction pek a tul a nih pawhin chief minister-in lo pe rawh se, a tul chuan ka tang mai ang, he thubuai hi sawrkar hmasa-ah CBI-ah pek an tum a, an pe leh ta lo a, CBI te kha lo kal se ka ti a, hlauhthawn tur ka nei lo e," tiin House chhungah hian a sawi a ni.