Aizawl : Khawthlangtuipui group YMA hmalakna in nimin khan Tlabung leh Lunglei inkalpawhna national highway 302 chhiat zualna lai, Sihphirtlang leh Tuichawng inkar chu hnatlangpui huaihawtin siamthat a ni a, hnatlangah hian mi 500 chuang an thawkchhuak a ni.

National highway 302 hi National Highways and Infrastructure Development Corporation Limited (NHIDCL) enkawlna hnuaiah, nikum kum tawp lam atang khan sial thata laih zauh mek a ni a. Mizoram hmun danga kawngpui dang sial that ve tho te ang lo taka lirtheia zawh hleih theih a nih tak loh avang leh Tlabung leh a chhehvel ten chak lakna kawngpui dang zawh tur an neih si loh avangin, thla eng emaw zat chhung chu ni tin deuhthaw lirthei an tan phah thin a ni.

Tun hnaia fur ruahtui a tlak vanga National Highway 302 hi a chhiat belhchhah hnu-ah, helai kawng zawh hian Ningani atang khan Tlabunga lirthei eng chi mah an tlan ngam tawh loh avang leh tun hnaiah kawng chhiat vang nia ngaihbelh theih tur thihna a thlen avangin, Khawthlangtuipui group YMA hruaitute chuan YMA branch hrang hrang hruaitute nen hnatlangpui neih hi an rel ta a ni.

Hnatlangpuiah hian YMA member bakah, hnam dang tiamin mi 500 chuang an thawh chhuah bakah, Tlabunga lirthei neitu inzawmkhawm pawl hrang hrangin lirthei 30 chuang an thawhchhuahpui bawk a, kawng khuar leh a diak zual thinna lai chu a theih ang anga hnawhin, harsatna tawk loa lirthei ten an zawh theih turin an thawm tha zel a ni.