Tualchhung

Ni 100 inhlawhna turin ruahmanna siam

Admin - May 02, 2021

Kumin atang hian Job Card Holder pakhatin nikhatah Rs 233/-  zel an hlawh tawh dawn a, kum kalta 2020-21 chhunga inhlawhna Rs 225/- aiin Rs 8 in a tam zawk a ni

Aizawl :Rural Development Minister Lalruatkima chuan hripui leng karah ni 100 inhlawh dan tur ruahmanna siam a ni a ti.

Minister chuan, “Mizoram pumah chawhruala lakin April thlaah ni 11,  May thlaah ni 12 leh June thlaah ni10 inhlawh turin ruahmanna siam a ni,” a ti a. “Kumin atang hian Job Card Holder pakhatin nikhatah Rs 233/-  zel an hlawh tawh dawn a, kum kalta 2020-21 chhunga inhlawhna Rs 225/- aiin Rs 8 in a tam zawk a ni,” a ti a. Tun dinhmunah Mizoram pumpui ah Active Job Card Holder mi nuai 2,5 l,481 an awm mek thu a sawi bawk.

Lalruatkima chuan, “MGNREGS hnuaiah hian tuihna tipung tam thei tura kum 2019 atanga “Jal Shakti Abhiyan - Catch the Rain Campaign” kalpui a nih atangin khaw thenkhatah tuikhur hnara contour trench an siam chuan tuihna a ti tam zualin, kum dang zawng aiin thalah pawh kang lovin tui a luang reng tawh,” a ti a.

Jal Shakti Abhiyan hi Mizoram khaw tinah kalpui tum a ni a. Hemi beihpui thlakna hnuaiah hian tuihna tipung thei tur leh ruahtui tla luang ral mai lo a lo dawng khawl thei tur Tuizem, Farm Pond leh Dug-Out Pond te siam tum a ni,” a ti a. Bawlhhlawh sawngbawl-na turin Compost Pit leh Soak Pit te chu Job Card Holder chhungkua te siam tir tum a ni tih a sawi.