August 17, 2022; August ni 2, 2022 zan dar 6:30 bawr vel a Sihhmui/Lengte kai, Leidawh bula car chesual a tel, Malsawmkima (10) ruang chu tukin dar 10 rik hma deuh khan Tlawnglui, Changsil kaiah hmuh a ni.

Sairang Dinthar Branch YMA secretary F. Zonunsanga sawi danin, tukin dar 9 bawr vel khan Buichali lei bul a hnamdang awm ten tui a ruang lolang an hmu a, Sairang police te an hriattir nghal a, police lamin Sairang Dinthar, Sairang leh Sihhmui YMA te an hriattir nghal bawk a ni.

YMA lam ten rang takin ruang hmuhna hmun Buichali lei lam an pan nghal a, huan kal tur mi thenkhatten hmun hnih ah an lo chang tawh a, an lo man hman lo a, hemi hnu hian Changsil kai lamah an tlan khalh a, reilote ah tuiin a rawn len thla hmuin, Sairang YMA member Tv. Lalrinsanga (Tea)  leh F. Zonunsanga, Sairang Dinthar YMA secretary ten tui tam tak karah an hnuk chhuak a ni.

Lui atanga ruang lakchhuah a nih hnuah Sairang Dinthar YMA Hall ah lak niin, YMA lam buatsaihin thlahna hun hman a ni a, Sairang Dinthar YMA ten Kuang an siamsak a ni.

YMA Hall-a hun hman zawh hnuah Sairang PHC-ah postmortem tura lak niin, hemi hnu hian an chenna panpui a ni. Ruahman dan chuan vawiin ah vui nghal a ni ang.
 
Sawmsawma ruang hmuh a nih lai hian a pa C. Lalfakzuala ruang erawh hmuh a la ni lo a, Central YMA chuan chinchang lo ngaihven turin Mualkhang, Khamramg, Hortoki leh Bairabi YMA lam te a hriattir nghal bawk.