August 22, 2022; Vawiin chawhma dar 11:30 bawr vel khan Tlawnglui, Sairang Dinthar huamchhung, GOP kai bulah August ni 2, 2022 zan a Sihhmui kai, Lei dawh bul a car chesual a tel C. Lalfakzuala @ Mafaktea (39) h/o Rebecca Lallawmzuali, Chatlang Lily veng ruang hmuh a ni a, zanin dar 7 ah an chenna in a vui tur a ruahman niin, a fapa Sawmsawma thlanah zalh a ni ang.

Sairang Dinthar YMA hruaitute sawi danin, vawiin chawhma dar 11:30 bawr vel khan Sairang Dinthar mi, nul huan a feh tur mi pahnih, Sairang balu kai atanga lawng a chhuk thla te chuan, Sairang lam atanga Buichali lei thlen hma deuh, GOP kai an tih bulah tui a mihring ruang lolang an hmu a, an thian dangte punin an la chhuak a, ruang hi bawhkhup zawngin tuiah a lolang a, tuikam vel a tuifu an tih mai chu ruang hian a lo zakzeh a, chu chuan a lo bat tang a ni.

Ruang hi a chhiat tawh deuh avangin tunge a nih hriat theih mai a ni lo a, vanneihthlak takin August ni 2, 2022 a an chetsual laia a thawmhnaw hak chu a ngai ang anga a lo la inbel avangin Mafaktea a ni tih finfiah a ni. Hemi chungchangah hian Sairang Dinthar atanga thudawnna chuan tui an tlak atanga ni 20 a liam tawh chunga thawmhnaw a lo la inbel thei chu thil mak a tling tih a sawi.

Ni 20 vel tuia a inchiah tawh chunga a rawn la langchhuak thei pawh helam a tawnhriat tam tak lo nei tawhte mak tih a tling a, Sairang chhehvel a tui tla vawi tam lo zawng tawhte ngaihdanah tun mai ah chuan Mafaktea ruang hi tuiah rawn langchhuak rih lo tura ngaih a ni. 

"Tui tla reng reng te an invai buaina ah te, tuiin a lenna ah te an thawmhnaw hak a inphelh tlangpui thin a, Mafaktea leh a fapa erawh an thawmhnaw hak ngai ang ang nen an rawn langchhuak a, ni 20 na vel a tui a a rawn lang thei pawh hi a mak khawp mai, vanduaina kar mahnise mite tawngtaina Pathianin a chhang a ni ber e..." thudawnna chuan a ti.

GOP kai a a ruang lakchhuah a nih hnu leh Mafaktea a ni tih finfiah a nih hnuah police ten an tih tur ang angte tiin, Sairang Dinthar YMA hall ah thlahna hun hman a ni a, hemi hnu hian Sairang damdawiin a Doctor in chawlh a lak lai a nih avangin Lengpui damdawiin ah postmortem tih a ni.

Chatlang Lily veng Branch YMA ten ruahmanna an siam danah chuan zanin dar 7 ah an chenna in ah vui a ni ang a, August ni 17, 2022, kar hmasa nilaizan a a fapa Sawmsawma zalh a lo nih tawhna thlan chu hai niin, thlan khat ah an pafa in zalh an ni ang.

Tarlan tawh thin angin, Mafaktea hi Chaltlang Lily veng-ah a nu Rozingi ho va, a nupui fanau te nen a khawsa an ni a, unau 4 zinga a naupang ber niin, an inpui nghaktu a ni a, Thuampui ah motor rawng kahna 'CK Enterprise' dawr neiin, a pain a boral san tawh a, a pa lungphun dan tur te pawh chhungkua a an sawiho lai mekin Mafaktea leh a fapa neihchhun Sawmsawma te chu August ni 2, 2022, zan dar 6:30 vel khan lirthei chesual ah an boral a, an chhiattawhna in zofate awmna tawh phawt chu a dengchhuak a, tuarpuitu an ngahin, lainattu thahnemtak an nei a ni.