Aizawl; April, 2022 atanga March, 2023 inkar khan Child Welfare Committee (CWC) chuan case 862 an ching fel a, hemi hun chhung vek hian Juvenile Justice Board (JJB) chuan case 208 an chingfel bawk.

CWC case dawn/ngaihtuah zingah hian nu leh paten chhan hrang hrang vanga an tih tur an hlen loh (incapacitated parents) chu a tam ber a, JJB case-ah hian rukruk chu a tam ber bawk.

CWC hian kum hmasa lama case chin fel hman loh (pending) 60 neiin nikum chhung khan case dawn thar 870 an nei a. A vaiin case 930 neiin heng zinga case 862 chu an ching fel a, case 68 chu kumthar lama ngaihtuah chhunzawm turin an dah a ni.

CWC case dawn thar zingah hian eng emaw chhan hrang hrang - ruihtheih thil, hrisel lohna, rualbanlohna leh thil dang avanga naupang enkawl chhunzawm thei lo ang chi chu tam berin case an dawn thar 862 zinga 222 chu hetiang case hi a ni a, case dawn thar atanga chhutin 26% a tling a ni.

Incapacitated parent bakah hian mipat hmeichhiatna rawngkaia inkhawihna te, naupang ngaihsak loh, naupang kut thlak thin te chu case langsar zual an ni a. CWC hian naupang 182 chu an chhungte kutah an hlan let a, 347 chu home-ah dah an ni a, 133 te chu councelling pek niin 106 chu an case an tihtawpsak bawk.

JJB hian nikum chhung khan kum hmasa lama case pending 41 neiin case dawn thar 228 an nei bawk a, case 208 ching felin a dang case 61 chu kumthar lama ngaihtuah chhunzawm turin an dah a ni.

JJB case dawn thar zingah hian rukruk chu tam ber niin 139 a awm a, case dawn thar zawng zawng atanga chhutin 70% a tling hial a. Rukruk bakah hian POCSO Act leh ND&PS Act te chu case langsar zual an ni. 

JJB hian naupang 74-te chu home a dah turin an ti a, 70 chu chhuah an ni a, CWC hnena thawn naupang 14 an awm bawk a, special home-ah naupang 38 thawnin pahnih chu thiltih sual an nei lo tih hmuh a ni bawk.

1. Nikum chhung khan Child Care Institution hrang hrangah naupang 675 dah (admit) an ni a. Heng te hi childrens home ah 400, observation home 204, special home 37 leh specialised adoption agency ah 34 te an ni.

2. Nikum chhunga home hrang hranga naupang dah 675 zinga 434 hi mipa an ni a, hmeichhia 241 an awm bawk.

3. CWC case dawn 870 zingah hian hmeichhia tam zawkin 469 an awm a, mipa 401 an awm bawk.

4. JJB case dawn thar zingah erawh mipa tam zawkin 211 an ni a, hmeichhia 17 an awm bawk.