Mihring theuh theuh a inan loh theih ngei mai. Thenkhatin kum khatna birthday bak an lawm hleih theih loh laiin, Nita Ambani chuan birthday lawm nan vaibelchhe 220 a hmang hem mai! 

India mai ni lo Asia khawmualpuia hausa ber Mukesh Ambani-a nupui Nita Ambani chuan November 1, 2013 khan a kum 50 tlin a lawm a, a ropui miah miah khawp mai. Hemi tuma an sumsen zat hu tun hnai khan media thenkhat ten an tarlang a, titi a siam nghal hat a ni. 

A lawmna hi Lavish Resort, Jodhpur-ah ni hnih chhung an nei a, he huna telte veivahna tur pawh thlawhtheihna 32 zet ruahman a ni! A birthday lawmpui tur hian mi 250 vel a sawm a, heng mite veivah nan hian Reliance Group ta charter flight 32 an hmang a ni. 

Nita Ambani birthday party atana an sum sen zawng zawng hi US Dollar maktaduai 30 zet a tling a, khatih hun lai khan India pawisa chuan cheng vaibelchhe 220 vel zet a tling! 

A piancham lawmpui tura a sawmte pawh an hraw hlawm hle a, a tam zawk chu sumdawng an ni nghe nghe. Milar a sawm zingah hian - Mittals, Mahindras, Birlas, Godrejs, Shah Rukh Khan, Aamir Khan, Karisma Kapoor leh Rani Mukherjee te pawh an tel a, Mumbai Indians IPL team pumpui an tel vek bawk. 

Priyanka Chopra leh AR Rahman te an perform a, Nita Ambani fanu Isha Ambani a perform ve bawk. Ni hnih chhung chauh atan hian Thailand atangin pangpar thahnem tak an chaw lut cheu bawk. 

Nita Ambani hi November 1, 1963 khan Mumbai, Maharashtra-ah a piang a, tunah chuan kum 59 mi a ni ve tawh. Reliance Foundation chairperson niin, Reliance Industries-ah Director a ni bawk. Mumbai-ah Nita Mukesh Ambani Cultural Centre a din a, hei hi tun hnai khan hawn niin India rama Cultural Centre lian leh ropui ber a ni. Indian Premier League cricket team Mumbai Indians neitu a ni bawk.