Prime Minister Narendra Modi-a kaihhruaia Inrinnia Delhi-a NITI Aayog Council thutkhawmah chief minister pasarih lai an tel lo.

Rajasthan Chief Minister Ashok Gehlot chuan a hriselna dinhmun a chhuanlam a, Kerala Chief Minister Pinarayi Vijayan chuan a chhan tak a sawi chiang lo thung.

Arvind Kejriwal chuan Zirtawpni khan Modi hnenah lehkha thawnin meeting chu sorkar laipuiin tun hnaia ordinance a siamah a lungawi loh vangin a boycott tih a hrilh.

Ordinance siam hi BJP kaihhruai sorkar laipuiin May 11-a Supreme Court thupeka Delhi sorkara hotu liante a thununna tur a ni.

Punjab Chief Minister Bhagwant Mann chuan sorkar laipuiin Punjab duhte a ngaihsak lo niin a sawi a, meeting hi a boycott tih a sawi bawk.

Nikum August-a thutkhawmah khan chief minister Rural Development Fund (RDF), thlai sengna hal, lo neitute kaihhnawih thilte sawi chhuakin sorkar hian engah mah a ngaihsak lo niin a sawi a ni.

‘Photo session’ mai mai ang lek a nih thu Mann chuan a lehkhaah hian ziakin, an buainate chin fel a nih hma chu tel ve a tulna a awm lo niin a sawi a ni.

Eptu hruaitu hlun, Telangana Chief Minister K Chandrashekar Rao, West Bengal Chief Minister Mamata Banerjee leh Bihar Chief Minister Nitish Kumar te chuan nakum Lok Sabha inthlan tura BJP epa tanho lehzual an tumnaah tun meeting hi an tel duh lo thung.