Aizawl: COVID- 19 No Tolerance Fortnight chu naktuk atanga November 9, 2020 inkar chhung hian khauh taka kalpui tum a ni a, mitthi vuina leh inneihna (man hlan/inneih inkhawm leh reception)-ahte a hmaa mi 50 chin tel phal chu mitthi vuina leh inneihna kaihhnawihah 35 chin punkhawm phal a ni a. Lungphun, anniversary, pawl thila kalkhawmna, book release leh a dang ah chuan mi 20 aia tam punkhawm khap a ni. Heng hmuna telte chhinchhiahna kimchang (hming, address, phone number leh kal hun te) ziahna bu register chu a huaihawttuten an vawng tur a ni.

Chief Secretary, Mizoram leh Chairman, State Executive Committee, State Disaster Management Authority ni bawk Lalnunmawia Chuaungo-in hriattirna a tihchhuahah chuan fortnight neih chhung hian COVID- 19 chungchanga himna lam inzirtirna, Jan Andolan Campaign chu mipuiah a tam thei ang ber kalpui tur a ni a. Sawrkarin Unlock 4.0 a lo siam tawh chu tlema her rem niin hengte hi tihdanglam a ni.

Head of Department/Head of office ten thawktu 70% chu a inchhawkin office an kaltir ang. Thawktu 30%, kum lama la naupang deuh leh hrisel zawkte chu ‘Covid 19 No Tolerance Fortnight’ chhunga DDMA-te tha tichak turin mahni district-a Deputy Commisioner theuhvah ‘COVID-19 Executive Duty’ atana hman turin an hming list leh nihna kimchang an thehlut anga, anni hian anmahni office-a kal lovin ‘COVID-19 Executive Duty’ hna hemi hun chhung hian an thawk ang. Thawktu zinga kum lama upa, natna benvawn nei, nau pai, adt. te chuan in lam atangin hna an thawk ang.

Head of Department/Head of office ten COVID- 19 lak a inzirtirna- mask vuah, inkar hlat taka awm (social distancing), kut silfai/tihthianghlim ngun, etc. chungchang tarlanna poster/ banner tam thei ang ber an office hmunhmaah mipui vantlang inzirtirna atan an kalpui ang.

School, college leh educational/coaching institute te chuan online hmang chauhin zirtirna an kalpui tur a ni. Zirtirtute rawn tura school kal pawh khap a ni. Games & sports tournament huaihawt khap a ni a, games & sports practice-na hmun indoor-ah chuan mi 10 leh outdoor-ah mi 25 aia tam awmkhawm phal a ni lo a, picnic spot leh gym pawh hawn phal a ni lo. Aizawl Municipal Area bika lirthei veivah dan turah Superintendent of Police, Traffic in ‘Traffic No Tolerance Drive’ a kalpui ang.

Chairman, State Executive Committee, State Disaster Management Authority thuchhuah chuan COVID-19 kai hmuhchhuah thar zingah kai chhan leh kaina tur awm hriat chian loh an pun tak zel avangin ‘Community Spread (khawtlanga hri darh)’ hi a awm tan tawha ngaih a ni, a ti a. He ‘Community Spread’ hi dan chah a nih theih nan ni 15 chhung ‘COVID-19 No Tolerance Fortnight’ hi hman tur a ni a, hemi hun chhung hian sawrkarin dan a siam, ‘The Mizoram (Containment & Prevention of the Spread of COVID-19) Act, 2020’-in mipuite zawm tura a tih te leh sawrkar thupek dangte khauh taka kenkawh tur a ni, a ti bawk.

‘The Mizoram (Containment and Prevention of the Spread of Covid-19) Act, 2020’ kenkawh a tumte-

1. Mipui punkhawmna emaw, vantlang hmunah emaw mask vuah loh Rs. 100
2. Mipui punkhawmna/vantlang hmuna social distancing kaihhruaina zawm loh Rs. 200
3. Vantlang hmuna chil chhak Rs. 300
4. Phalna la hmasa lova pawl leh kohhran anga intawhkhawmna huaihawt Rs. 5,000
5. Thuneitute phalna la lova ramri (State) kan Rs. 5,000
6. Sawrkar inkaihhruaina siam anga inkhunghranna (quarantine/isolation)-a awm tura tih te zawm lo Rs. 3,000 thleng.
7. Hun bi tuk ral hmaa quarantine/isolation chhuahsan Rs. 1,000 aia tlem lo, Rs. 5,000 thleng.
8. Quarantine facility-a awm laia mi dangte himna tichhe thei zawnga khawsa Rs. 1,200 aia tlem lo, Rs. 5,000 thleng.
9. Central leh State Sawrkarin COVID19 hri leng darh zel tur venna atana inkaihhruaina a siamte zawm lo Rs.1000 thleng.
10. Phalna la hmasa lova COVID19 vei leh veia rinhlelh te nihna leh thlalak media hrang hrang –print, electronic leh social media hmanga tarlan Rs. 2,000 aia tlem lo, Rs.10,000 thleng.
11. Sawrkar hnathawk duty-te hnathawk tur tikhaihlak zawnga harsatna siam Rs. 2,000 aia tlem lo, Rs. 10,000 thleng.
12. Official te thawhpui duhlo Rs. 1,000 aia tlem lo, Rs. 5,000 thleng.
13. Information dik lo pe chhuak Rs. 1,000 aia tlem lo, Rs. 5,000 thleng.
14. COVID-19 hri leng dona kawnga information pawimawh hupbet/pe chhuak duh lo Rs. 1,000 aia tlem lo, Rs. 5,000 thleng.
15. State Sawrkarin COVID-19 hri leng dona atana inkaihhruaina a siam (Containment&Surveillance plan/ Instruction/Guideline) zawm duh lo Rs. 1,000 aia tlem lo, Rs. 5,000 thleng.
16. Hremna anga pawisa chawi tur te pe duhlo chu Judicial Magistrate First Class Court-ah dan anga hrem theih an ni ang. Tan inah thla 3 atanga kum 1 thleng khung theih.