Ju-Jitsu Association of Mizoram (JAM) atanga Mizoram aiawha tel pali chuan 3rd 'Rolling Rabbit' Northeast Open Jiu-Jitsu Tournament-ah hlawhtlinna changin medal an la vek a. Asian Games-a medal la ngei turin an inbuatsaih zui mek.

Northeast Open Jiu-Jitsu Tournament hi Zirtawpni atanga Shillong, Meghalaya-a khelh kha niin Thawhtanni khan an zo va. Mizoram atanga kalte hian gold leh bronze medal pahnih ve ve an hawn.

Lalnunsanga, Chawnpui chuan kg 65 hnuai (Under-18)-ah inlanin vawi thum a khelhah submission-in a chak vek a. Quarter final-ah armbar from triangle, semi final-ah Ezekiel choke leh final-ah Armbar-in a chak a ni.

Lalhmangaihzuala, Republic Veng chu kg 58 hnuai Senior-ah inlanin ani pawh vawi li a khelhah submission vekin a chak a. Round of 16-ah Kimura from triangle, quarter final-ah rear naked choke, semi final-ah Ezekiel choke leh final-ah rear naked choke-in a chak leh.

Hmangaihzuala hi Mixed Martial Arts (MMA)-ah pawh India ram huap inelnaah medalist ni lai a ni. 

M.S.Dawngtluanga, Khatla chu kg 75 Senior-ah inlanin vawi hnih khelhah submission-in a chak a, semifinal pel zo lo mah se bronze a la a. Khatla tlangval tho, Andrew VL Hruaitluanga, Khatla chu Senior-ah kg 65 hnuaiah inlanin bronze a la ve bawk. 

JAM President Rothuamliana chuan an fighter-te an che thain Mizoten Brazilian Jiu-Jitsu (BJJ)-ah hma an sawn tawh hle tih a sawi a. "Asian Games-ah pawh telh a nih tawh avangin medal la ngei tura hma lak zel kan tum," a ti a. State sorkar hnuaiah pawh affiliation an hmuh thuai a beisei thu a sawi bawk.