Aizawl: November 2020 atang chuan Aizawl khawpui bawlhhlawhte chu a paihna hmun thar Solid Waste Management Centre (SWMC)-ah chauh paih phal a ni dawn a. Bawlhhlawh thliar hrang lote chu a paihna hmun tharah hian an paih ve thei tawh dawn lo niin AMC hotute chuan an sawi.

“Bawlhhlawh paihtute hnena kan pek thin token pawh a hluia paihtute hnenah chuan kan pe tawh dawn lo a, November 1, 2020 atang hi chuan bawlhhlawh paihna hmun thara luh chat hi kan tum a ni,” tiin AMC lam chuan ZALEN an hrilh.

AMC thawktute chuan bawlhhlawh thliar hna chu hun eng emaw chen atang khan ti turin khawpui chhung Local Council-te an hriattir tawh tih sawiin, “Inpeih tak tak a awm thei loa, kan kalpui a mipui lamin bawlhhlawhte an thliar a ngai a ni,” an ti bawk.

AMC Town Planner Ralthuam Ralte chuan Tuirial a Solid Waste Management Centre chuan Aizawl khawpui bawlhhlawh paihna tur a dawn zawh loh thuai dawn avangin hetiang hmun hi Hualngohmun, Sihphir leh Luangmualah te hmunhma an nei tawh tih Zalen hrilhin a hmunhma sawngbawlna atan hian DPR pawh an buatsaih mek niin a sawi bawk.

Zalen thudawn danin tuna bawlhhlawh paihna atana hman mek Tuirial dumping ground hi khar tawh turin High Court, Mizoram Pollution Control Board leh Environment, Forest & Climate Change department te chuan an hriattir tawh a, mahse harsatna hrang hrang avangin khar theih a la ni lo a. AMC lam pawhin a paihna hmun tharah hian paih turin ruahmanna an siam thin a; mahse, hri leng avang leh lockdown avangin insawn mai a har nia hriat a ni. Aizawl khawpui bawlhhlawh paihna hmun thar Solid Waste Management Centre-ah hian Aizawl khawpuia veng (Local Council) 57 chuan an bawlhhlawh an paih tawh a, veng 26-in an la paih ve lo nia thudawn a ni.

Aizawl Solid Waste Management Centre-ah hian bawlhhlawh phur lirthei bukna tur weighbridge pahnih dah a ni a. Bawlhhlawh tawih theite chu sawngbawl zuiin, leitha siam nan hman a ni a; leitha siamna hmanrua Mechanical Compost Plant (ni khata kg. 50,000 sâwngbâwl thei) leh Vermi-Compost Plant (ni khata kg. 22,000 dawng) bun a ni. Bawlhhlawh tawih thei lo, hman nawn theih leh hralh leh theih turte thliar hranna hmun Waste Resource Centre bun a ni a, chu chuan ni khatah kg. 74,000 a khawih thei dawn. Bawlhhlawh tangkaina nei tawh lote phum bona tur, Sanitary Landfill Centre siam a ni bawk a, ni khatah kg. 44,000 paih theihna tura duan niin, kum nga daih tura siam a ni.

October ni 23, 2020 (Zirtawpni) chawhma dar 11 khan Aizawl Municipal Corporation BOC Meeting Hall-a Board of Councillors meeting chuan Aizawl veng tina PPP Mode-a bawlhhlawh paihna lirthei hman man (hiring rate) ennawnin rate thar an pawm a. Hiring rate thar hi tuna rate hman lai aiin a pum puiah 10.67%-in a sang zawk a, hiring rate thar hi November, 2020 atanga hman tan tur a ni. AMC hian bawlhhlawh paihna lirthei hman manah hian thla tin Rs. 50,10,240.00 a seng thinin kum khatah Rs. 6,01,22,880.00 a seng thin a. Rate thar hi hman a nih hunah chuan thla tina senso tur hi Rs. 55,45,280.00 a ni tawh dawn a, kum khata chhungin Rs. 6,65,43,360.00 sen a ngai tawh dawn a ni.