Aizawl July 13, 2023 : NTUM chuan Muster Roll/casual te hlawh pun nan sawrkarin Minimum Wages Act 1948, a ennawn hnua cabinet-in pass a notification a tichhuak chu lawmthu an sawi a, hetihlai hian cabinet in a pass tawh tho, mi hnuaia thawk te hamthatna tur, The Shop and Establishment Act pawh notification chhuah thuai se an duh thu an sawi.

NTUM chuan 2020 khan MR sang riat chuang zet chu sawrkarin NTUM ngenna avangin Provisional Employee (PE) ah hlan kai tawh a, ti. Tun dinhmunah MR hi 3365 sawrkar record-ah an la awm mek a, anni hi tun hlawh ennawn ah a hlawkna teltu hmasate an nih thu an sawi a, MR awm mek te hi Provisional Employee (P.E) an nih ve theih nan sawrkara dil mek leh bawhzui a nih thu an sawi bawk.

18.5.23 a Cabinet-in a pass zingah khan dawr neia sumdawng hnuaia thawkte hlawh hniam ber tur Minimum Wage zat tuksakna, The Shop and Establishment Act hnuaia mi, tun thlenga notification chhuah a la ni ve rih lo erawh notification chhuah thuai se an duh thu an sawi.

NTUM chuan private establishment hnuaia thawk zawng zawng pawh an huam tel vek an ti a, heng hnathawktute chanvo pek theihna dan chi hrang hrang te hman a nih theih nan hma an lak mek thu leh hnathawktu zawng zawng te an chanvo humhalhna dan ngaihven nachang hre thar zel turin an ngen.

Private Establishment/Private Company hnuaia thawktute tan pawh damlo inenkawina atan ESI hi hman theih a nih sa reng avangin, hnathawktu an chhawrte tan hmansak ngei turin an phut bawk a ni.