Aizawl June 29, 2023 : Mizoram Pradesh Youth Congress Committee (MPYCC) chuan Deputy Chief Minister Tawnluia Department chan pakhat hnuaia cheng nuai 100 chuang hnathawhna awm loa ziah ral nia sawi awm chu, a rang thei ang bera chhui turin Chief Minister Zoramthanga leh Deputy Chief Minister Tawnluia te an phut tih an sawi.

Congress Thalai chuan Mizoram Legislative Assembly Speaker Lalrinliana Sailo, USA Maryland a zin tuma a thu sawi tun thlenga bawhzui a la ni lo chu vawiin thlengin engmah hmalakna awma an hriat loh avangin an tawng chhuak ta tih an sawi. "Chiang taka eirukna awm nia langah pawh kan sawrkar hian hmalak a tum lo hi nâ kan ti a, hetiang thil chiang pawh a chhuichhuak ngam lo a nih chuan sawrkar zel tlakah kan ngai lo a ni," an ti.

Lalrinliana Sailo hian Dy. Chief Minister Tawnluia Department chan hnuaiah dik lo taka cheng nuai 100 chuang hnathawh awm lova ziah ral a awm tih a hriat thu Chief Minister Zoramthanga leh Dy. Chief Minister Tawnluia te thutdun lai ngei-a a hrilh thu leh an Department chan en uluk a tul thu a hrilh hial thu a sawina video ngei, mitin hmuh theiha Youtube-a tlangzarh a ni hi sawrkar tan a mualpho thlak kan tiin pawi kan ti hle a ni, an ti.

Mizoram Legislative Assembly Speaker Lalrinliana Sailo, Maryland USA a zin tuma a thusawi Youtube-a tlangzarh-a nih hma pawh hian, Speaker Lalrinliana Sailo hian kumin January 30, 2023 khan MNF Minister leh MLA te an inhmuhkhawm tumin, Chief Minister Zoramthanga leh Dy. Chief Minister Tawnluia te thutdun laiin Dy. CM Department hnuaiah cheng nuai 100 hmanna awm lova ziah bo a ni a, Dy. CM Department hnuaia thawk pakhat leh JE pakhatin hrehawm ti taka an ziah ral thu a lo hrilh tawh tih Speaker hian a sawi bawk a. He thil thleng hi tha a tih loh em avangin an Department chan chu en uluk tawh turin a hrilh hial niin a sawi bawk. 

MPYCC chuan, Assembly Speaker meuhin Chief Minister awm lai ngeia Deputy Chief Minister khak a, a Department chana cheng nuai 100 chuang hmanna awm loa ziah ral a nih thu a hrilh bakah; an Department chan enkawl uluk tura a hrilh hial hnuah pawh MNF Sawrkar Chief Minister Zoramthanga kaihhruai hian ngaihven lovin eirukna hi a ngai pawimawh lo tih a ti langchiang a, an ngaih thu an sawi.