SSU Award 2015 chu tun hnai khan Student Self Support Union chuan huaihawtin lehkha zir chunga thawhchhuah neite zinga hlawhtling tam tak zingah mi 3 thlanchhuah an ni a, Thalaite Minister tia hriat hlawh tak Zodintluanga chuan chawimawina thu ziak leh sum cheng sing khat theuh a hlan a , kal khawm te chu sawrkar hna chauh hnaa ngai lo turin a fuih bawk a. Award dawn phu mi 3 thlang chhuak turin Endiktu atan Mizoram Journalist Association General Hqrs ah hotu thenkhat ruat an ni bawk a ni. Ram te reuh te, khawvel dangin an tlawhpawh mang loh leh a chhunga awm tam tak chuan khawvel dang an tlawhpawp lem lo a; Mizo history pawh a la naupanga, Mizo hrim hrim hi a Hnam ang pawhin thil hre tlem kan nih a rinawm. Sawrkar chu hna pe theitu ber a nih avangin hna zawng te’n an bawh ber a ni tlangpuia. Kum 40 aia tam inrelbawlna mumal hawi zawnga hmasawn tumte ngaihdan tlanglawn hi a dik tawk lo niin a ngaih theih rum rum. Sawrkar hna thawkte chuan thlabi hlawh an nei a, an tar hunah pawh pension an la nei zela, tihtawp ni tawh mahse tuna pension hnaih tawh emaw pension tawh la dam rual zinga a tam zawk chuan ‘hmathlir thui’ an tlachhama, lo neih ai chuan office thuthleng a dup zawka an hriatna chuan ‘kut hnathawh’ chu an fate rilru ah hnahniam angin an ngaih tuh tlat a, insawi thaihna lar tak a ni bawk. Nu le pate hi demhleihtheih an nih lohna chin a awm a, Mizoram piah lam ngaihthuah ngaihna an la nei thiam lo a; tun hun hi thlir thiam an tam a rinawm loh. Kuthnathawk hmusit tawk vel; hnathawh hlutna awmzia hre fumfe si lo an pung ta reng a ni. Kum tamtak thawhchhuah mumal nei lovin Zoram a kal tawh a, tunah hian Central sawrkar chuan sum a pek thin ti tlemin state te chu thawh tam turin a phut a. Chutih laiin thang khat lian aia rei tawh atanga vawiin thlengin thawhchhuah mumal State in a nei hlei thei lo a, tuna sum harsa pawh hi a bul ber chu ‘ram a intodelh loh vang’ a ni a, a tawpah a in hnawh khawma a ri ta huk ni berin a lang. Retheihna in a tur chhuah thingtlang mite chuan ‘a suala sual chhuah’ a tul tih an hriaa, lehkha zir zawm turin khawpui an lut a; mahni inchawm chu sawi loh athen chuan an chhungte an pui let zawk hial a. Tulna avangin chawhmeh zawrh, ek paih, ran vulh, mi ina awmpui anga awm, lei lai leh an theih ang angin sum an hai luta, an lehkha zirna lamah midang aiin an bei nasa bawka an hlawhtling duh deuh zel. Hnathawh chu zahah an la loa, hreawm tih chang an neih pawhin ‘loh theih loh’ nain a nawr thlu a, tunah chuan ‘ka zak lo’ tiin an au ngam tawh a, nuamsa taka khawsa, harsat awmzia hre map lo khawpui thalai te hian thingtlang mi retheite atang hian zir tur an ngah hle, an nu leh pate te pawhin an tihawm tawk leh tangkai nih an zirtir leh zual a hun ta hle mai. Zirlai ni chunga inchawm te hian naupang te in hnathawh hlutna an hria a, ‘nun zirlaibu’ (text book of life) a pawimawh tam tak thiam thil ‘life skills’ an nei tawh a, lehlamah chuan vanneihna niin a lang thei a. Hnathawh zawh tawk pawm thei loa, hetiang rilru put nachang hre lote chu mi khawngaihthlak ber pawl an ni hial ang. Mihring damchhunga pawimawh ber chu mahni kea din a ni a, a zir hma apiangin nun an hmang thiam ang ti ila kan sawi sual thui lo ang. Khawsak harsa lo hnathawh kher ngai lo zirlai te leh nu leh pa te pawhin ngaihtuahna hmang nawnin zirlai tibuai lo tawk turin an fate hnathawh tir phal sela, hmuh a hrehawm a nih pawhin an tana tha tur a nih chuan an tih a ngai tih inhria sela, intih hmuh ching hial zawk ila, hetiang mite ngaihsan inziritir bawk ila tuna harsatna ramin a tawh ang chi hi pumpelh theih a nih rinawm. Bul tan a tha ber ang.