Aizawl: Tripura transit camp a khawsa mek Mizoram mi leh sa Bru te hruaikir hna chu October ni 3,2019 atang hian thawh tan tum a ni a. Hetih lai hian Bru te hian thilphut thar an nei a, kir duh an awm dawn leh dawn loh hriat a la ni lo.

Zalen palaiin Home Department hotute hnen atanga thu a dawn danin transit camp zingah Kaskau camp a awm te chu Mamit district ah hruai hmasak an ni ang a, Naisingpara camp a khawsa te Lunglei district leh Hazacherra camp a khawsa te chu Kolasib ah hruai an ni ang a, a indawtin camp hrang hrangah hian hmalak chhunzawm zel tum a ni. Bru hruaina motor hi hun hmasa lamah Tripura sawrkarin ngaihtuahin a bill hi Mizoram sawrkarah an thehlut thin a, mahse tun tumah chuan Aizawl city bus leh maxi cab te hman tum a ni a. Lirthei ngaihtuah tura Tripura sawr-kar an tih tawh lohna chhan hi 'bill a to thin em vang' niin an sawi.

Home department hotute chuan Bru hruaikirte lo chawlh lai-lawkna 'facilitation centre' atan hian Kan-hmun khua chu hman a ni leh dawn tih an sawi a. Zana riahna atan hian Kawrtethawveng, Mamit leh 4th IR Batallion te awmna pawh a remchan ang anga hman a ni dawn tih Zalen an hrilh a. Bru hruaikirna tur senso leh an inbenbelna tur sum chu sawrkar laipuiin a rawn pe (sanction) tawh tih an sawi bawk.

Chhinchhiah danin kum 2016 khan Bru hruaikir tur hi chhungkaw 5407 an awm a, kumin July thlaa enfiahna ah chhungkaw 4000 chuang deuh chuan Mizorama let an duh thu hi an sawi a. Tun tumah hian haw duh te chauh laklet tum a ni. Nikum 2018 chhung khan Bru chhungkaw 39 Mizoramah an let a ni.

Mizoram sawrkarin Bru te hruai kir tura hma a lak mek lai hian Mizoram Bru Displaced People's Forum chuan thil phut thar engemawzat an nei a, an thilphutte ngaihtuah tur hian Joint Monitoring Group thutkhawm leh phawt an ngiat. Thudawn danin MBDPF President A. Sawibunga leh general secretary Bruno Msha te chuan an thilphut hi tunhnai khan chief minister Zoram-thanga hnenah an hlan. Bru thilphut zingah hian an kirna tur khua ah te inbenbelna tur ram a awm tha tawk lo niin an sawi a, an duhna hmunah awmtir turin an ngen bawk.

Hei bakah July ni 3-20,2019 inkara relief camp hmuna official-ten Mizoram mi leh sa dik tak an nih leh nih loh an endik laiin inlan ve ta lo chhungkaw 1218 te chu a hranpa a endik nawn leh ni se. Relief camp 6-a awmte chauh ni lo, Nov.13,2009-a Bungthuam rawlthar kahhlum a nih avanga Tripura a pemte pawh chhawmdawl tur zinga telh ve nise an ti a. An thil phutte ngaihtuah turin Joint monitoring group meeting chu Agartala emaw Kanchanpur ah neih nise an ti nia thudawn a ni.

Tun tum hi Bru hruaikir hna thawh vawi 9-na tur a ni a, a hma-lama hruaikir hna lo thawh tawhna ah harsatna neuh neuh a awm thin avangin a nawlpuia lo let an awm lo a. Sawrkar chuan hruaikir hna hi October 1,2019 atanga thawh a tum a, mahse Bru te bazar ni a nih avang leh a tuk (October ni 2) chu India Hnam Pa Mahatma Gandhi piancham anih avanga pisa chawlh anih dawn avangin October ni 3 atangin hruaikir hna hi thawh tan a ni dawn a ni.

July ni 3,2019 khan Union Home Minister Rajnath Singh, Mizoram leh Tripura chief minister bakah Mizoram Bru Displaced People’s Forum (MBDPF) chuan inremna ziakin Bru chhungkaw 5,407 a mi 32,800 te chu September ni 30,2018 hma ngei a Mizoram hruai kir tur tih a ni a. Sawrkar laipui chuan Bru lo kir te hi chhungkaw hotu ber bank account-ah cheng nuai 4 dah sak vek te, in an sakna senso atan Rs.1,50,000 pek, kum hnih chhung a thlawna buhfai pek leh thildang hamthatna pek te a remti a ni.