Aizawl April 7, 2024 : Mizorama kohhran hrang hrang pariatte inzawmkhawmna, Council of Churches in Mizoram (CCM) chu October thla hian hawn tuma ruahman a ni.

Mizorama Kohhrante Inpumkhatna (Council of Churches in Mizoram) Joint Committee hi Nilaini chawhnu khan J.M Lloyd Hall, Synod Office-ah an thukhawm a, hetah hian kal zel dan turte an rel a ni.

Synod Moderator Rev. Lalnghakliana kaihhruai thutkhawmah hian kohhran hrang hrang aiawh kalkhawmte chuan CCM dinna tura drafting committee-in inrelbawlna leh kalphung tur an duante chu an kohhran theuh rorelna sang berah an thlen thu leh thutlukna an siam dante an sawi a. Kohhran pawl hrang hrangte hian CCM din chu rem an tih theuh thu an sawi bawk.

Meeting hian CCM constitution te, hawnna inkhawm programme te duang turin drafting committee chu an ti nghal a, hei hi July thlaah an thlirho leh ang a, October thlaa hawn turin an tinzawn nghal bawk.

CCM-ah hian Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist kohhran, Evangelical Free Church of India, Isua Krista Kohhran, Bualpui (Ng) leh Salvation Army te an tel a. Thutkhawm hnuhnung berah hian heng kohhran aiawh mi 37 an tel a ni.