Aizawl May 30, 2023 : Congress Legislature Party (CLP) Leader leh Thorang Bialtu MLA Zodintluanga Ralte chuan zirlaite chu 'off-screen' hun nei tam tur leh lehkhabu chhiar tam a pawimawh thu leh a tul thu a hrilh.

CLP Leader chuan, "Screen-time' insiama inkhuahkhirh hi a that rualin, zawm a har avangin tul leh mamawh takzetah lo chuan 'screen' hi kan khawih loh a tha ber tawh a. Naupang awmtlei nana phone pekte avanga harsatna hi a taka Mizoram-ah ngei kan natna hmachhawn lian tak a ni mek a ni," a ti.

Zodintluanga chuan, Kuminah pawh zirlai titha bik lehzualte pawh kan hriat angin 'social media' khawih tam lo, 'screen' hmaa hun hmang tam lo an ni a. Lehkhabu chhiar tam bawkin a ler lam zel an luah a ni, a ti.

Zirlaite chu Lehkhabu chhiar tam tura fuihin, "Engtiklai mahin lehkhabu chhiar zaute hi an inchhir ngai lo a. Biate khuate pawh kum 1992-a Di In Library an neih hmain YMA hruaituten lehkhabu thahhnem tak an inkawlchhawk thin," tiin. Naupangin an hawh nasa thin thu leh Library-a lehkhabu awmte chhiar zawh vek theih an tum thin niin a sawi bawk.

Thorang bialtu MLA chuan, "Tuna la hlawhtling ve lote tan hun tha a la inher dawn a, tun hi kan tawpna a ni lo a, bul kan tanna chauh a ni. Zirnaah hian a pawimawh ber chu beidawn loh leh mi puitling nih theih a ni ber a ni," Bialtu MLA chuan a ti bawk.

Lungsen North Branch YMA Hall a, MZP Sub-Headquarters; Lungsen ten kum 2022 - 2023 chhung a, HSLC pass thar te lawmpuina an buatsaih-ah fuihna thu sawiin, Zodintluanga chuan, "Ka bial chhung Lungsen khuaa zirlai titha lawmpui tlak heti zat kan nei hi a lawmawmin, kan thlen china hlawhtlinna neite kan lawmpui hle bawk a ni," a ti a.

Thorang Bialtu MLA chuan, COVID-19 avanga 2020 chhova zirna kalpui dan danglam a ti a, Loh theih lohna avangin 'online' lam hawia kal nasat avangin; phone, laptop leh a kaihhnawih 'screen' lam a bih nasat loh theih loh thu leh Naupang atanga upa lam thlengin 'off-screen time' nsiam a ngaih thu a sawi.

Zodintluanga chuan, Zirlai kan nihin phone khawih loh tur kan inzilh ngawt thei lo a, tihtur leh rilru dang lakpenna tur kan dap a tul ber a. Lehkhabu chhiar bakah; taksa sawizawina lam nasa takin kan uar thar a tul tih hi a pawimawh a ni, tih hi kan puangzar zel a pawimawh a ti bawk.

MZP Sub-Headquarters Lungsen te hian kum 2022-2023 chhunga Lungsen khua atanga HSLC Pass mi 21 te hnenah chawimawina thilpek an hlan a. Lungsen High School atangin mi 18-in HSLC an pass a, midang 3 hi hmun dang atanga pass an ni.