Oil, LPG, buhfai chawkluh phalna FCI atangin hmu tawh

Admin - Aug 01, 2021

Assam in economic blockade an neih hnuah, Tripura atangin Mizoram mamawh bungrua chaw lut nghal

Aizawl; Ramri hrul a buaina thleng vangin Assam in Mizoram mamawh chawkluhna kawngpui dang chat mek mahse, Tripura atangin Mizoram mamawh chawkluh mek a ni a, Tripura, Dharmanagar FCI Depot atangin Mizoramin oil leh LPG lakluh phalna FCI atanga a hmuh hnuah, buhfai chawkluh phalna a hmu fel leh tawh bawk.

Food Civil Supply & Consumer Affairs (FCS&CA) department Director Ramdinliani hnen atanga ZALEN thudawn danin, Assam in economic blockade an neih hnuah, Tripura atangin Mizoram mamawh bungrua chawkluh nghal a ni a, Tripura ah boruak tha lo a awm a nih loh chuan mamawh lakluh a tluan zel beisei a ni.

FCS&CA Director sawi danin Zirtawpni zing leh Inrinni zing, darkar 24 chhung khan Tripura atangin buhfai bag 150, alu bag 629, purunsen bag 143, dal bag 29, tel box 416, chini, purun var, artui leh taza engemawzah lakluh a ni a, petrol leh diesel rawn lut bawkin, nimin lam khan LPG truck trip 2 Dharmanagar ah thun a ni a, nimin tlai khan oil phur tanker 2 MIZOFED, Aizawl ah a rawn thleng bawk.

POL leh LPG Tripura atanga lakluh ah trial neih a lo ni tawh tih sawi bawkin, FCS&CA Director chuan, mipui nitin mamawh dang lakluh ah erawh trial neih a ngai lo tih a sawi. Mizoram pumpui mamawh tur lakluh a nih vangin tam tham deuh a lakluh a ngaih thu te, chumi tur chuan hmalak mek zel a nih thu te a sawi.    

Manipur lam chu kawng awmsa nimahse tun ang fur ruahtui tlak lai chuan a kawngte a thui tham bawk nen bungraw rawn lut pangngaite bak a hranpa a bungraw lakluh a awm rih loh thu sawiin, tun dinhmunah chuan Tripura, Dharmanagar atangin oil leh LPG lakluh phalna FCI atanga hmuh a nih tawh anga lakluh mek a nih thu leh FCI atang vekin buhfai lakluh phalna pawh hmuh a nih tawh thu a sawi.

"Rel kawng tihchhiat a nih tak ah chuan Bairabi atangin buhfai la thei lo mah ila FCI dawr fel tawh a ni a, Tripura, Dhamanagar FCI Depot atangin chawkluh a ni dawn a ni," FCS&CA Director chuan a ti.

Assam lamin Mizoram mamawh chawkluhna kawngpui ber an danchah mek vangin Bairabi - Zamuang - Kanhmun kaltlangin Tripura atangin Mizoram mamawh bungrua chawkluh mek a ni a, he kawng hi nikum lam a Mizoram sawrkarin, 'Mizo Hnam Project' tih vuah a a cheithat a ni.

Share now