DOWNLOAD OUR APP

Read latest news on your phone
app-store
Oil palm suat chhan chin dan dik tawk lo, vbc 14 hu leisak tawh
Oct 13, 2019

Bukvannei-ah oilpalm her khawp hmuh loh vangin kar 1-ah vawi 3 chiah her thei

Aizawl: Mizorama oil plam leitu company pathumte chuan Mizorama oil palm cheng vaibelchhe 14 chuang hu lei tawh mah se thudawn danin kut hnathawktu thenkhat chuan an beisei ang a phak loh avangin an oil palm-te enkawl chhunzawm duh tawh lovin an suat mek a, Agriculture Department lam chuan a chin dan dik tawk loh vanga suat a nih thu leh chin dan dika chingte zingah suat an awm an hriat loh thu Zalen an hrilh a. Hetih lai hian Kolasib bul Bukvannei chuan khawl her khawp oil palm lei tur an la hmu thei lo bawk.

Agriculture thawktute chuan oil palm chin chu a hlawk tih sawiin beidawn vanga kit an awm an hriat loh thu sawiin tun hnaiah mi thenkhatten oil palm chu a hlawk loh em avangin an suat a, thlai dang an ching nia sawi chu a dik lo niin Agriculture thawktute chuan Zalen palai an hrilh a. “Oil palm hi thlai dang aiin a hlawk a, kum khatah vawi 3 a thar thei a. Tun hnaia suat nia an sawite hi a tira a chin dan dik tawk lo, puitling mah se rah tha thei lo turte an ni a. Keini chuan a hlawk loh vanga suat an awm kan hre lo,” an ti. Tunhnaia oilpalm suat anga thuthang awm chu department lamin enfiah an tum niin an sawi bawk.

Thudawn danin Bukvanneia Godrej-in khawl an bunah hian kar khatah ni 3 chiah khawl an tinung a, heti chung hian an her khawp lei tur an nei lo niin an sawi.

Mizorama oil palm leitu company pathum Godrej Agrovet Pvt.Ltd., Ruchi Soya Industries Ltd. leh 3F Oil Plam Agrotech Pvt. Ltd. chuan Mizorama loneitute oilpalm thar chhuah 14.8 metric ton an lei tawh.

Heng zingah hian Godrej chuan lei hnem berin Rs. 13,40,17,759 hu an lei a. Ruchi Soya in Rs. 1,30,24,487 hu leh 3F-in Rs. 11,50,648.50 hu an lei tawh a. Godrej Agrovet Pvt. Ltd. hian Kolasib leh Mamit district-te chang mah se heng district bakah hian Serchhip leh Aizawl district-a thar chhuahte an lei tel a, tunah hian Bukvanneiah oil palm mill dinin an her mek a ni.

Ruchi Soya Industries Ltd. hian Lunglei leh Lawngtlai district an bial a, 3F Oil Plam Agrotech Pvt. Ltd. hian inremna ang chuan Serchhip leh Aizawl district an bial thung a ni.

Company pathumte hian oilpalm hi kg ah Rs. 5:50 in an lei a, Mizoram sawrkar chuan kuthnathawktute hi support price pein kg ah Re. 1 zel a pe a ni.

Oil palm leina man tihsan chungchang chu price fixation committee thuneihna a ni tih sawiin a man chungchangah Oilpalm mill neitu leh sawrkar lam thu a inhmu chiah lo niin department thawktute chuan Zalen an hrilh bawk a. “Mill neitute chuan a rah lei tur a tlem avangin a man san harsa an ti a, ‘lei tur tam se a man kan san ang’ an ti a. keini lamin ‘a man sang se hralh tur a tam ang’ kan ti bawk a, kan la indawr hrih a ni,” an ti.

Kolasib leh Mamit district-ah hian Oilpalm huan nei thahnemtak awmin, Godrej Company ten Bukvannei an Oilpalm Mill ah Oilpalm te hi an her mek a, heng Oilpalm rah her tur te hi Godrej Company ten Collection centre an siam atanga phur khawmin, oil palm neitute bank account-ah regular takin an oil palm hralhna an pe thin a, Godrej Company hotute sawi danin Mamit leh Kolasib district-a oil palm te hi uluk taka enkawlin a rah hralh vek sela chuan he Mill hi chawm tawk tawh tura ngaih a ni.

Hetih lai hian Oilpalm rah hralhna Kg 1-ah Rs 5.50 chu kum 10 chuang hman tawh nia sawiin a hralhna rate leh a rah lawhna hlawhfa rawih na senso atan, amah leh amah a intumtawk chauh nia an hriat avang leh a hralhnaah oil palm neituten hlawkna an chan phak loh avangin buaipui zui loh mai duhin, thenkhat chuan an oilpalm an suat mek a ni. Hetianga oilpalm chingtu ten harsatna an tawh nachhan chu agreement angin sawrkarin oilpalm hmalakna a ngaihven tawk lo nia an hriat thu Oilpalm chingtute chuan an sawi a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh