Aizawl August 8, 2022 : Vawiin khan Commonwealth Games Gold medalist Jeremy Lalrinnunga chuan Lengpui Airport-a Press mite a hmachhawn naah, Paris Olympic Games a tel a tum ngei thu a sawi a, heta tel tur hi chuan a weight khelhna aia rit zawkah a khelh a ngai tawh dawn bawk a ti.

Olympic-ah 67 Kg. hnuailam Weightlifting hi paih a nih tak avangin Jeremy hian Olympic a khel duh a nih chuan a rihna a belhchhah ngei a ngai dawn. Weight sang zawka khel tura awmze neia intih rih chu thil huphurhawm tak a nih thu Jeremy chuan a sawi a, chutihrualin Paris Olympic-ah tel ngei a tum. Jeremy hian weight tisang zawngin intihsiakna hi a lo hmachhawn tawh a, 2018 Youth Olympic Games-ah khan Kg 62 hnuailamah khelin gold medal a dawng a, nikum-a Commonwealth Championship-ah kha chuan tuna a khelhna Kg 67 hnuai-ah a khel a, gold medal a la leh tho a ni.

Nimina thuthar thehdarhtute a hmachhawn naah Ainawn Veng rawlthar chuan, Commonwealth Games zawh takah khan Gold la mah se, a beisei zat a chawi loh thu a sawi a, inkhelh laiin a malpui tihrawl a nat thu leh a kiu bawr tihrawl pawh a nat thu a sawichhuak. Inkhelh hmaa warm-up pawh a malpui na avang hian a ti mumal lo, a ti a, a Kiu bawr tihrawlh hi a chawi laia na a nih thu a sawi bawk. 

Kha intihsiaknaah khan Jeremy hian Kg 67 chin inelnaah snatch-ah kgs140 kg chawiin clean and jerk-ah kg 160 chawiin a pahnih belhkhawmin kg 300 a chawi a, amah dawttu Samoa's veteran lifter Vaipava chuan kg. 293 chawiin silver a awrh a, Nigerian weighlifter Edidiong Joseph Umoafia chuan kg. 290 chawiin bronze a awrh a ni. Jeremy hian Snatch-ah Kg 143 chu chawi leh tuma a beih hnuah a hlawhtling lo a, Clean and Jerk-ah pawh Kg 165 chawi tuma a beihna chu a hlawhtling zo lo bawk a, national media te pawhin hliam nei hmel a put thu an ziak hlawm.

Jeremy hi amah lawmna hunah hian thu sawina hun pek a ni a, Pathian chu pawimawh hmasaber a nih thu a sawi a, thu sawi thiam a nih loh thu leh sawi tur a hriat mai loh thu a sawi. A medal lak chu Mizo mipui te tan a ni, a ti. Programme kaihruaitu-in rit a chawi dawna a sawi ziah thin chungchang a zawhna chu Jeremy-a chuan, "Ka pu in a thih hmaa mi chah, 'Lalpa chakna min pe ang che, Hallelui-ah Amen,' tih chu ka sawi ngei ngei thin," a ti.