Aizawl: Myanmar ramri hnaih district thenkhata DC-ten khapna thupek an chhuah chungin, October 26, 2022 khan Siaha police chuan foreign bike ‘125’ (One tru fai) 16 an man.

Mizoram police thuchhuah tar lan danin state chhunga dan lova Chinese-origin foreign bike-te lakluh khap a ni chunga heng Kenbo (foreign) bike tam tak, dan lova lakluh leh hman mekte endikna ‘special drive’ chu October 26 zan khan Siaha police chuan hmun li - Siaha dai, Kawlchaw, Phura leh Tuipangah te an nei a, foreign bike 16 lai man niin dan angin hma an la zui nghal.

Myanmar hnaih district thenkhat DC-te chuan thupek tichhuakin Mizoram hmun tam tak, a bikin Myanmar ramri hrul khuaah China siam, Kenbo bike kawl leh hmang thin an awm tih hriat a nih thu leh hetianga foreign bike Myanmar atanga Mizoram chhunga dan lova lak luh hi phal a nih loh thu an lo tar lang tawh.