Aizawl October 18, 2022 : Vawiin khan Sairang Zero Point-ah MNF Diamond Jubilee lungphun, Aizawl West I MNF Block buatsaih chu Pu Lalruatkima, MNF adviser chuan a hawng. Aizawl West I MNF Block Political training chu Lalruatkima Ministechuan khuallian niin a hman pui a, Mumal taka MNF kan kal laiin Opposition party-te an chiri hle, a ti a, MNF a sawrkar leh ngei a rin thu a sawi bawk. 

Holiday Palace-a hun an hmannah Lalruatkima chuan thu sawiin, "Kum 2023 inthlanpui-ah Pathian leh mipui zarah MNF kan sawrkar leh ngei ka ring a. Pu Zoramthanga Chief Minister, ram vei mi, vision nei ṭha, a taka thawk thin kan nei a. Mumal taka MNF kan kal laiin Opposition party-te an chiri hle. Congress party-te India ram hmun ril lamah awmzia an awm tawh lo a, Mizoramah lah nise hmanni maia mipuite hnawl hnu kha an ni. Congress hi mipuiten tute nge an nih kan hria a, sawrkar turin mipui rin an la hlawh lo tih a chiang. ZPM lah nise, an party kalphung pawh a mumal lo hle a. An president Pu Lalliansawta'n 'kan sawrkar chuan Pu Lalduhoma a CM ang' a ti a. Amah Pu Duhoma ve thung chuan, 'kan sawrkar chuan CM tur chu Val Upa Council-in a rel ang' a ti lawi a. An thu leh an chhezia leh ui bengah hlin tur a awm lo a ni," a ti. 

Ruatkima chuan, "Congress sawrkar laiin Zu zawrh avangin Zoram mipui kan rum thin a, tunah chuan a lo reh ta a. Tlaivara gas chan a bo a, hnianghnar takin gas kan nei ta a. Kawng hrang hranga mipuite nitin mamawh kan lo hnianghnar ta viau a ni. Eiruk do nan Lok Ayukta kan din ang, kan ti a, kan din a. Zirtirtu ringawt pawh 3000 chuang kan la tawh a ni. MNF hian thalai lehkha thiam tan sawrkar hna a siam hnem ta hle. Lifetime vehicle tax mipui tana phurrit pawh zangkhai zawkin mipui tan siam rem a ni ta bawk a ni," a ti.

Pu Ruatkima chuan, "Zoramin hun harsa leh manganna kan tawk a; lungthu pathum - sorkar, kohhran leh tlawmngai pawl kan ṭangrual a, tumah chhuanchham kan awm lo. A lawmawm tak zet a ni. Pathianin he ram tana malsawmna min pek MNF sawrkarah hian kan hmu tam hle a ni," a ti a. "Term lehah hian MNF a sorkar leh ngei ka ring a, MNF sorkar kaltlangin Pathianin Zoram hi nasa zawkin malsawmna min vur ka ring tlat a ni," a ti bawk.