Aizawl Mizoram pumah damdawi ti thinten an ngheina atana an hman Opioid substitution therapy (OST) la mi 3062 an awm mek a. Tun dinhmunah OST la mekten harsatna an tawh awm hriat a ni lo.
Zalen palaiin Mizoram State AIDS Control Society (MSACS) thawktute hnen atanga thu a dawn danin OST hi National AIDS Control Organisation (NACO) ruahman angin an pe thin tih an sawi a. Damdawi ti thin, sim duhte hnenah OST chu an pe thin tih sawiin damdawi in atangin drug ti thin emaw, an chhungte mi rintlak emaw hnenah chauh he damdawi hi an pe a, NGO te erawh chu lock down chhung hi chuan an inhawng lo niin an sawi a. OST la thinten damdawi an nghei thut a hlauhawm avangin an ei chhunzawm ngei an duh tih sawiin a sem hna pawh an thawk mai niin an sawi.
MSACS thawktute chuan an hnena inziak lut (register client) zingah harsatna tawk (drug suffer) an awm an hriat loh thu an sawi a, hetih lai hian an hnena inziak lut lo hnenah damdawi hi an pek theih loh avangin mi thenkhat, inziak lut loten harsatna an tawk niin an sawi a. Damdawi nghei duhte chu Mizoram Drug User Forum te nen tang tlangin a zawnchhuah hna thawkin OST la duhte chu an pui thei niin an sawi a. An client-te tan chuan theih tawp an chhuah tih sawiin damdawi pawh an la nei ngah a, a pekchhuah kawngah pawh harsatna an nei lem lo niin an sawi bawk.
MSACS thawktu te chuan Mizoramah dam-dawi (drugs) chu vang deuh mah se mi thenkhat chuan an la hmu thei tho nia an hriat thu Zalen an hrilh a. Tuna inkharkhip hman mek chu thlah thut a nih chuan damdawi a zalen leh ang a, tuna ti thinten an dose an hriat dawn loh avangin OD vanga thihna tam tak a thleng thei tih sawiin fimkhur a ngai hle niin an sawi bawk.