A hriselna dinhmun that loh vanga tour a chawlhsan lailawk hnuah English singer Ozzy Osbourne chuan show a neih hmabakte chu a cancel thu leh, tour a neih tawh loh tur thu a puang. 

Kum 74 mi hian Nilaini khan thuchhuah hi a siam a, kum li liam ta khan accident na tak a tawrh thu a sawi. Vanduaina a tawh tum hian a spinal cord a sawh chhia a, tour nei leh turin a taksain a tlin tawh lo tih a sawi. Operation pawh chi thum lai a ti a, therapy a la bawk. "Ka aw chu tha reng mah se ka taksain a tin tawh lo a ni," tiin fante hriatthiamna a ngen. 

Ozzy Osbourne hi heavy metal band Black Sabbath-ah an member pawimawh tak a ni a, band leh solo ang pawhin rimawi lama chawimawina sang Grammy Award a lo dawng ve ve tawh a ni. Kum 2019 khan tour a nei leh a, mahse a taksa lamah harsatna a neih avang hian a tawp san zui ta a ni.