DOWNLOAD OUR APP

Read latest news on your phone
app-store

PAHOSS a tawp lo, Chhunzawm zel tum ; “Kilkhawr deuh pawh, kum 5 ah a kilkhawr dawn lo” - Tawnluia

Jun 21, 2022

Urban Development and Poverty Alleviation (UD&PA) changtu, deputy chief minister ni bawk Tawnluia'n chuan Parking House Support Scheme (PAHOSS) chu a la tawp lo tih sawiin, chhunzawm zel tum a ni tih a sawi a. PAHOSS hnuaia hmalakna, kilkhawr deuh kan tih pawh, kum 5 a vei chuan kilkhawr a ni dawn lo tih a sawi.

PAHOSS NIH PHUNG
# A tlem berah LMV 5 emaw, two-wheeler paruk (6) emaw dah theihna a ni tur a ni a, a tam lamah bituk a awm lo. 
# LMV pakhat (1) emaw Two-wheeler (6) emaw park theihna zelah cheng nuai 1 zel tanpuina dawn theih a ni. 
# PAHOSS tanpuina dawngtute chuan kum 10 tal parking atan an hmang tur a ni.
# PAHOSS in a tum ber chu khawpui chhunga Traffic Jam nasa tak sutkian nana parking space tam zawk siam a ni.

Aizawl June 21, 2022 ; Urban Development and Poverty Alleviation (UD&PA) changtu, deputy chief minister ni bawk Tawnluia'n chuan Parking House Support Scheme (PAHOSS) chu a la tawp lo tih sawiin, chhunzawm zel tum a ni tih a sawi a. PAHOSS hnuaia hmalakna, kilkhawr deuh kan tih pawh, kum 5 a vei chuan kilkhawr a ni dawn lo tih a sawi.

ZALEN zawhna chhangin deputy chief minister chuan, Covid vanga sawrkar sum harsatna vangin PAHOSS chu kalpui chhunzawm a ni rih lo tih sawiin, sum dinhmun a ziaawm hunah chhunzawm zel tum a ni tih a sawi. PAHOSS hnuaiah garage sa zo tawh an awm thu te, sa mek te pawh an awm rualin, scheme atanga inhnukdawkte pawh an awm tih a sawi a, chung mite chuan dan angin an sum te sawrkarah an pe kir tih a sawi bawk.

PAHOSS hnuaia hmala te chu anmahni hmunhma leh anmahni in sa an nih nghal avangin sa tha lo an awm a ring lo tih Tawnluia chuan sawi bawkin, scheme tha tak a nih vangin tum hma atanga kalpui tawh ni phei sela chuan tun aia chhawr tangkai lehzual theih a nih a rin thu a sawi.

RTI Act hmanga UD&PA department-a zawhna, SPIO-in November, 2021 a a chhan danin, Aizawla PAHOSS dawng turte chu North Zone, South Zone, East Zone leh West Zone-ah then a ni a, tun thlenga tanpuina dil mi 1,458 atangin mi 402 thlan tawh an ni. 

Kum 2019 atangin Aizawlah kalpui tan a ni a, 2019-2020-ah cheng nuai 917.60 hman niin, 2020-2021-ah cheng nuai 78.30 leh 2021-2022 chhungin cheng nuai 128.90, a vaiin cheng nuai 1,124.80 hman a ni tawh.

RTI chhannaa tarlan a nih danin PAHOSS kalpuina sum hi state sawrkar sum atanga hmuh niin, eng tik thlenga kalpui tur nge tih chu sawrkar thutlukna tur a ni. PAHOSS hnuaiah hian mi pakhata pawisa pek tur zat bituk a awm lo.

Aizawl khawpui chhungah parking house sak zawh 11 awm tawhin, chungte chu CM Zoramthanga, Dy. CM Tawnluia leh AMC Mayor Lalrinenga Sailo ten nikum December ni 15 khan an lo hawng tawh a ni.

Share now