Cheng 11,04,40,000 senga siam, Ni zung chakna hmanga tui lakna, Khaw 4 chawm tur

Aizawl : February 28, 2020 Zirtawpni khan MJA, Lawngtlai District chuan khaw pali - Paithar, Rulkual, Vanhne leh Saikah chawm thei tur, Cheng 11,04,40,000 seng a siam, Ni zung chakna hmanga tui lakna, Paithar Combine Water Supply Scheme chu an tlawh.

Lawngtlai Distrct MJA President Lalngheta Ralte chuan, sorkar in ram hmasawnna tura hna a thawh hrang hrangte, mipuite’n tangkai takin an hmang thei em tih chu MJA te chuan an ngaihven ber a nih thu a sawi a, sorkar hmalakna hrang hrangte mipui hriat a puanzar chu an duh ber a nih thu leh tuna Ni zung chakna hmanga tui lakna hi sorkar in a ruahman ang taka mipuite’n tangkai taka an hman theihna turin duhsakna a hlan.

EE PHE Lawngtlai Division, Netralal Jaisi pawhin MJA te ruahmanna site visit an neih thei chu lawmawm a tih thu a sawi a. Hmasawnna kawnga hna an thawhna kawnga department leh khawtlang hruaitute thawhhona tha tak an neih avanga Ni zung chakna hmanga tui lakna puitling mai tur chu lawmawm a tih thu a sawi. Jaisi hian Paithar Combine Water Supply Scheme chu hlawhtling mai tur a nih thu a sawi a, JJM hnuaiah chhungkaw tinah free connection an pek tur thu a sawi bawk a ni.

He ni zung chakna hmanga kawlphetha siam chhuah nan hian Solar Module 175 awmna 55 Kw hmanga tui pump chhuak tura ruahman a ni a, mi pakhat in nitin tui liter 55 zel dawng thei tura kalpui niin Kum 2049 thleng tuna an tui lakna Kurung Lui atang hian tui hi an pump thei dawn a ni. Lawngtlai District ah hian Ni zung chakna hmanga tui lak hi a tum khatna ni lovin, Fangfar Lui chu lak a lo ni tawh a, tuna Paithar Combine Water Supply Scheme hian chhungkaw 320 a chawm thei dawn a ni.

Paithar Solar Combine Water Supply Scheme a Solar plant hi P & V Eastern Engineer, Bawngkawn Aizawl ten a hna hi thawk in, a hna dang zawng erawh chu Lawngtlai PHE Division ten thawk ve thungin Commission theih tura peih pel a ni tawh. Paithar Combine Water Supply Scheme hi Rs 11,04, 40,000 (Rs 1,104.40 lakhs) senga siam niin, NABARD Loan atangin 90% leh Mizoram Sorkar atanga 10% hmangin he hna hi thawh a ni.