DOWNLOAD OUR APP

Read latest news on your phone
app-store
Pakistan-in a ram mi thata puhna India-in pha
Jan 26, 2024

Pakistan-in Indian agent-ten an ram chhungah kum 2023-ah Pakistani khua leh tui pahnih an that nia an sawi chu India-in a dik loh thu a sawi.


Ottawa-in Canada ram chhungah Sikh inlak hran tum pawla mi thahnaah India a inrawlh nia a puh hnuah Pakistan hian hetiang deuh hian a puh thar ve mek.


Ningani khan Islamabad hian mi pahnih thahna leh Indian agent-te inzawmna chu ‘finfiahna tha tawk’ an nei niin a sawi a ni.


India foreign ministry erawh chuan ‘India huatna thu phuahchawp’ tiin a chhang let.


Pakistan-a thahte hi September, 2023-a Rawalakot khawpuia Muhammad Riaz leh October, 2023-a Sialkot khawpuia Shahid Latif thihna a ni a. An ram foreign ministry-in Ningania thuthar lakhawmtute an kawmnaah pakhat hi mosque-a a tawngtai lai kah hlum a ni a, pakhat hi khawlaiah a ni thung tih an sawi.


Pakistani foreign ministry hian tute nge he thil titu tih a sawi lo va, Delhi hian eng vanga heng mite that tura a hmelma rama mi a tirh chhan engmah a sawi lo.


Foreign Secretary Muhammad Syrus Qazi chuan he inthahna hi ‘pawmzam rual loh’ a nih thu leh ‘ram dang inrelbawl hranna palzutna’ a nih thu a sawi.


“Document, sum leh pai leh forensic-a Indian agent pahnih an inrawlh ngei tih finfiahna kan nei a ni,” a ti.


India hian ‘chiang takin khawvel dan bawhchhiain tharum a thawh’ tih a sawi bawk.


India hian Pakistan puhna hi chiang takin chhang lo mah se he ram hi ‘firfiakna hmunpui, inrelbawlna hran neia pawikhawihna leh dan lova chetna hmunpui’ tiin a sawi.


“India leh ram tam takin Pakistan hi a ram chhunga firfiakna kalphung leh tharum thawhna hian a eichhe mek tih an lo sawi tawh thin a ni,” tiin Indian foreign ministry chuan thuchhuah a siamah a tar lang.


Qazi-a hian Pakistan-a inthahna chu Canada leh US-a thil tih tum ang tho a nih thu a sawi a. Hetih lai hian US-a inthah tumna sawi erawh Muslim ni lovin Sikh thah tumna a ni thung.


November, 2023 khan US chuan Indian pa pakhatin New York-ah American khua leh tui, Khalistan (Sikh ram hran ngiattu) thah a tum lai an man tih an lo sawi tawh.


Nikhil Gupta-a hi Indian sorkara mi pakhat, a hming tar lan loh leh he thila man pawh la ni lo pakhatin a tirh angin hetianga chet hi a tum nia sawi a ni.


White House chuan India-a hotu liante atangin hetianga mi thah tuma mi phiarna hi a awm niin a sawi a. India pawhin high-level inquiry committee dinin US sorkar thil sawi chhui turin a ti.


US-in mi thah tum a man hma lawk hian Canada Prime Minister Justin Trudeau chuan June thlaa British Columbia-a Sikh hruaitu thahnaah Indian sorkar an inrawlh tih ‘finfiahna tha tak’ an neih thu a lo sawi tawh a. India erawh chuan he inthahnaah engmah inrawlhna an neih loh thu a sawi.


He inpuhna avang hian ram pahnih inkar pawh a khik phah.


Khalistan movement hi India-ah hian kum 1980 chho khan tharum thawha helna nen a lian hle a, a bikin Sikh tamna, Punjab-ah a nasa zual.


Sipai chakna hmanga hmeh mih a ni a, India-ah phei chuan an lian tawh lo va; mahse, Canada, Australia leh UK Sikh awmte zingah a la lian viau thung.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh