ZALEN July 16, 2024; Mizoramin hall/auditorium a neih changtlun hmasak, tun thlenga ngaihhlut la hlawh Vanapa Hall hi a hrana lirthei hun/dahna (parking) nei a ni lo a, a bul kawngpui sir hman mai thin a ni.

Tun hma atanga tun thlengin 'Vanapa hall nge nge' tih a la ni reng a, hall/auditorium changtlung leh tha awm thar zel mah se ngaihhlut hlawh hall a la ni reng.

Hetihlai hian a hranpa a parking nei a nih loh avangin hall kawt, motor kawngpui dung, kawng sir chu parking atana hman thin a ni a, hall hman hlawh tak leh mi tam tak punkhawmna a nih avangin traffic che vel-ah nghawng a nei lo thei thin lo.

Mizoram sawrkarin Vanapa hall sak thatna tur, detail project report (DPR) Rs. Vbc. 37 senna tur a buaipui tih kumin kum tir khan CM Lalduhoma'n thuthar thehdarhtute a lo hrilh tawh a, hei hi a hlawhtlin a, Vanapa hall hi sak that a nih dawn chuan Vanapa hall hmangtute tan mai ni lo, mipui nawlpuite lirthei dah theihna tur parking siam theih nise, chutiang ang ruahmanna chu Aizawlin a mamawh.

Aizawl khawpui laili a hall hman hlawh tak, a hrana parking nei si lo ding luah hi Aizawl khawpui thang chho mek nen a inhmeh tawh lo niin a lang.